ఒకప్పుడు ఐటీ రిటర్నులు(ఐటీఆర్) దాఖలు చేయటం అనేది ఓ పెద్ద ప్రక్రియ. ధ్రువీకరణ పత్రాలు, రసీదులు తదితరాలను భౌతికంగా సమర్పించాల్సి ఉండేది. వెరిఫికేషన్కు చాలా సమయం పట్టేది. రిటర్నులు ఖాతాలో కొన్ని నెలల తరవాత జమ అయ్యేవి. కానీ ఇప్పుడు ఈ పద్ధతి అంతా మారిపోయింది. దాఖలు నుంచి ఖాతాలో జమ వరకు ప్రభుత్వం సులభమైన, వేగవంతమైన పద్ధతి ప్రవేశపెట్టింది.
మొత్తం ఆన్లైనే...
ఇప్పుడు భౌతిక ప్రక్రియకు ఆదాయపు పన్ను విభాగం స్వస్తి పలికింది. 80 ఏళ్లు దాటిన వయోవృద్ధులకు మాత్రమే ఆఫ్లైన్ ద్వారా సమర్పించవచ్చు. మిగతా వారు తప్పనిసరిగా అంతర్జాలాన్నే అశ్రయించాల్సి ఉంటుంది.
వెరిఫికేషన్కూ అంతర్జాలమే...
వెరిఫికేషన్ అనగా మనం సమర్పించిన వివరాలు, పత్రాల తనిఖీ. ఐటీ రిటర్నులు పొందటానికి ఇదే చివరి ప్రక్రియ.
కొంతకాలం క్రితం అంతర్జాలంలో రిటర్నులు దాఖలు చేసినప్పటికీ... ఫామ్ను ప్రింట్ తీసుకొని సంతకం చేసి ఆదాయపు పన్ను విభాగంలోని కేంద్ర ప్రాసెసింగ్ సెంటర్కు పంపించాల్సి ఉండేది. ఈ పద్ధతిని సులభతరం చేస్తూ ఈ-వెరిఫికేషన్ను తీసుకొచ్చింది ఐటీ శాఖ.
ఇందుకోసం ఈ-వెరిఫికేషన్ సేవలు అందించే బ్యాంకు ఖాతా ఉండాలి. మీరు ఇంటర్నెట్ బ్యాంకింగ్ లాంటి సదుపాయాలను ఉపయోగించుకోవచ్చు. ఆధార్ ద్వారా వెరిఫై చేసుకోవటం మరో పద్ధతి. మీ ఆధార్తో ఫోన్ నంబరు అనుసంధానం అయి ఉండాలి.
ఇదీ పద్ధతి...
ఐటీ రిటర్నులు దాఖలు కోసం మొదట పన్ను చెల్లింపుదారుగా నమోదుకావాలి. ఐటీఆర్ వెబ్సైట్లోనే ఈ సదుపాయం ఉంటుంది. ఇంతకుముందే మీరు ఈ ప్రక్రియను పూర్తి చేసినట్లయితే సైన్ఇన్ అయి ఫైలింగ్ ప్రక్రియను పూర్తి చేసుకోవచ్చు.
ఇలా దాఖలు చేయండి...
1) ఆదాయపు పన్ను వెబ్సైట్లోకి వెళ్లండి. పైన కుడి వైపు ఉన్న లాగిన్ను క్లిక్ చేసి పాన్కార్డు సంఖ్య, పాస్వర్డ్తో లాగిన్ అవ్వండి. అప్పుడు మీకు డ్యాష్బోర్డు పేజీ తెరపై కనబడుతుంది. ఐటీ రిటర్న్ ఫైలింగ్, సమర్పించిన రిటర్నులు చూసుకొనేందుకు ఇక్కడ వీలుంటుంది.
2) 'ఫిల్లింగ్ ఆఫ్ ఇన్కమ్ ట్యాక్స్ రిటర్న్'పై క్లిక్ చేయండి. అనంతరం పాన్ నంబరు, అసెస్మెంట్ ఏడాది(మీరు ఫైలింగ్ చేస్తున్న సంవత్సరం) నమోదు చేయండి. మీ అర్హతకు అనుగుణంగా ఐటీఆర్ దరఖాస్తు 1, 2, 3లలో ఏదో ఒకదానిని ఎంచుకోవాలి. మొదటిసారి సమర్పించినట్లయితే ఒరిజినల్, ఇంతకుముందు సమర్పించిన వాటిని సవరించాలంటే రివైజ్డ్లను ఎంచుకోవాలి.
3) గతసారి వెరిఫై అయిన ఐటీఆర్ దరఖాస్తు నుంచి ఉద్యోగం రకం, ఇంటి వివరాలు, బ్యాంకు వివరాలు, సెక్షన్ 89 ప్రకారం పన్ను మినహాయింపు లాంటి వివరాలను నింపుకోవటానికి అవకాశం ఉంటుంది. ఈ సదుపాయాన్ని ఉపయోగించుకొని వివరాలు సమర్పించవచ్చు.
4) ఈ స్టెప్లో ఆదాయపు పన్ను గణన, పన్ను సమాచారం, చెల్లించిన పన్ను, విరాళాలు(సెక్షన్ 80జీ, సెక్షన్ 80జీజీఏ) లాంటి వివరాలు నింపుకోవాలి. అనంతరం ఐటీఆర్ను సమర్పించాలి.
ఇలా రిజిస్టర్ అవ్వండి...
1) ఐటీఆర్ వెబ్సైట్లో పైన కుడివైపులో ఉన్న 'రిజిస్టర్ యువర్సెల్ఫ్' అనే దానిని క్లిక్ చేయండి.
2) తదుపరి స్టెప్లో వ్యక్తిగతం, హిందూ ఉమ్మడి కుటుంబం లాంటి వాటిలో మీకు తగిన ఆప్షన్ ఎంచుకోవాలి.
3) ఈ స్టెప్లో పాన్ సంఖ్య, పేరు, పుట్టిన తేదీ లాంటివి నింపి కంటిన్యూ క్లిక్ చేయండి.
4) ఇందులో ఫోన్ నంబరు, చిరునామా, మెయిల్ ఐడీ, ఫోన్ నంబరుతో పాటు రెండు సెక్యూరిటీ ప్రశ్నలకు సంబంధించిన వివరాలు నింపాలి.
5) ఈమెయిల్ ఐడీ, ఫోన్ నంబరును ఓటీపీతో వెరిఫై చేసుకుంటే రిజస్ట్రేషన్ ప్రక్రియ పూర్తి అవుతుంది. ఈమెయిల్కు యూజర్ ఐడీ వివరాలు వస్తాయి.
