సాధారణంగా కేంద్రం బడ్జెట్ ప్రవేశపెడుతుందంటే.. సామాన్యుల నుంచి వ్యాపారుల వరకు.. వేతన జీవుల నుంచి కార్పొరేట్ల వరకు ఎన్నో ఆశలు పెట్టుకుంటారు. అలాంటిది ఈ సారి కరోనా వల్ల ఏర్పడిన ప్రత్యేక పరిస్థితుల నడుమ బడ్జెట్ రాబోతోంది. దీనితో అన్ని రంగాల్లో అంచనాలు మరింత పెరిగాయి.
కరోనా వల్ల తీవ్రంగా కుదేలైన రంగాల్లో సూక్ష్మ, చిన్న, మధ్య తరహా పరిశ్రమలు (ఎంఎస్ఎంఈలు) కూడా ప్రధానంగా ఉన్నాయి. దీనితో ఎంఎస్ఎంఈలు కొవిడ్ తెచ్చిన సంక్షోభం నుంచి బయటపడేందుకు.. అన్ని సాధారణ నిబంధనల్లో ఐదేళ్ల మారటోరియం అవసరమని ఆర్థిక మంత్రి నిర్మలా సీతారామన్కు సూచిస్తున్నారు నిపుణులు. ఈ సారి బడ్జెట్లో ఆ దిశగా నిర్ణయాలు ఉండాలని అంటున్నారు.
'దేశ ఆర్థిక వ్యవస్థలో కీలకంగా ఉన్న ఎంఎస్ఎంఈలు కరోనా నుంచి తేరుకోవాలంటే.. కేంద్ర, రాష్ట్ర ప్రభుత్వాలు ఈ అంశాన్ని పరిగణనలోకి తీసుకోవాలి.' అని ఫెడరేషన్ ఆఫ్ కర్ణాటక ఛాంబర్స్ ఆఫ్ కామర్స్ & ఇండస్ట్రీ (ఎఫ్కేసీసీఐ) మాజీ అధ్యక్షుడు డీ మురళీధర్ 'ఈటీవీ భారత్'కు ఇచ్చిన ప్రత్యేక ఇంటర్వ్యూలో పేర్కొన్నారు.
పర్యావరణం, పన్నులు సహా వివిధ నిబంధనలు.. ఎంఎస్ఎంఈలు, మధ్య స్థాయి పరిశ్రమలకు భారంగా మారుతున్నాయని అంటున్నారు మురళీధర్. 'నిబంధనలపై మారటోరియం విధించడం అనేది పూర్తిగా ప్రభుత్వం చేతుల్లో పని. దీని వల్ల అదనపు ఆర్థిక భారంల కూడా పడదు. కానీ ఎంఎస్ఎంఈలకు మాత్రం డబ్బు, సమయం రెండు ఆదా అవుతాయి.' అని చెబుతున్నారు.
కేంద్ర గణాంక కార్యాలయం అంచనాల ప్రకారం.. దేశ ఆర్థిక వ్యవస్థ మొత్తం ఔట్పుట్లో 30 శాతం ఎంఎస్ఎంఈలదే. మొత్తం ఎగుమతుల్లో 48 శాతంతో వీటి ద్వారానే జరుగుతున్నాయి. 11 కోట్ల మందికి ఎంఎస్ఎంఈలు ఉపాధి కల్పిస్తున్నాయి.
అధిక వడ్డీ రేట్ల భారం..
ఎంఎస్ఎంఈలు ఎదుర్కొంటున్న ప్రధాన సమస్యల్లో వడ్డీ రేట్లు కూడా ఉన్నయన్నారు మురళీధర్. ఇతర రంగాలతో పోలిస్తే ఎంఎస్ఎంఈలు రుణాలు పొందడంలో చాలా ఇబ్బందులు ఎదుర్కొంటున్నాయని తెలిపారు.
'ప్రపంచవ్యాప్తంగా ఇతర దేశాలతో పోలిస్తే.. దేశంలో వడ్డీ రేట్లు రెండేళ్లుగా కాస్త తగ్గుతూ వస్తున్నాయి. అయినప్పటికీ.. ఎంఎస్ఎంఈలు మాత్రం ఇంకా అధిక వడ్డీకే రుణాలు తీసుకోవాల్సి వస్తోంది.' అని తెలిపారు. ముఖ్యంగా గృహ, విద్యా రుణాలతో పోలిస్తే.. ఎంఎస్ఎంఈ రుణాలకు వడ్డీ రేట్లు ఎక్కువగా ఉన్నట్లు గుర్తు చేశారు.
ఎంఎస్ఎంఈ రుణాలకు వడ్డీ భారం తగ్గించేందుకు బ్యాంకులతో కేంద్రం చర్చలు జరపాలని మురళీధర్ కోరారు. తక్కువ వడ్డీకి రుణాలు లభిస్తే.. ఎంఎస్ఎంఈల నిర్వహకులు ఎక్కువగా పెట్టుబడి పెట్టగలుగుతారని, సంస్థల సామర్థ్యాలూ పెరుగుతాయని విశ్లేషించారు.
లాక్డౌన్తో దెబ్బతిన్న సూక్ష్మ, చిన్న, మధ్య తరహా పరిశ్రమల (ఎంఎస్ఎంఈ)ను ఆదుకునేందుకు.. కేంద్రం గత ఏడాది అత్యవసర రుణ గ్యారెంటీ పథకాన్ని తీసుకొచ్చింది. ఈ పథకం కింద రుణాలు పొందేందుకు.. 2021 మార్చి వరకు గడువు పెంచింది.
ఇదీ చూడండి:బడ్జెట్ తర్వాత తగ్గనున్న ఆ వస్తువుల ధరలు!
