కరోనా వైరస్ కారణంగా బ్రిటన్ ఆర్థిక వ్యవస్థ మూడు శతాబ్దాల కనిష్ఠానికి పడిపోనుందని హెచ్చరించింది బ్యాంక్ ఆఫ్ ఇంగ్లాండ్. అయితే.. వచ్చే ఏడాదికి రికార్డ్ స్థాయిలో కోలుకుంటుందని ఆశాభావం వ్యక్తం చేసింది. తొలి త్రైమాసికంలో 3 శాతం క్షీణత నమోదవగా.. అది రెండో త్రైమాసికానికి 25 శాతంగా ఉంటుందని తెలిపింది బ్యాంకు. దీంతో ఈ ఏడాది ఆరంభంతో పోలిస్తే.. అర్ధవార్షికానికి 30 శాతం మేర క్షీణిస్తుందని అంచనా వేసింది.
నిరుద్యోగం రెట్టింపు..
దేశంలో నిరుద్యోగ రేటు రెట్టింపునకు పైగా పెరిగి 9 శాతం మేర ఉంటుందని అంచనా వేసింది బ్యాంకు. ప్రభుత్వం 80 శాతం జీతాలు చెల్లించే సంస్థల్లో ఉన్న సుమారు 6 లక్షల మంది సిబ్బందిని ఈ లెక్కల్లో కలపలేదని.. వాటిని తీసుకుంటే మరింత ఎక్కువగా ఉంటుందని తెలిపింది.
ఏడాది రెండో అర్ధభాగంలో..
లాక్డౌన్ ఆంక్షలను సడలించే చర్యలు చేపట్టిన తర్వాత ఈ ఏడాది రెండో అర్ధభాగం నుంచి బ్రిటీష్ ఆర్థిక వ్యవస్థ కోలుకోవటం ప్రారంభమవుతుందని వెల్లడించింది బ్యాంకు. మార్చి, ఏప్రిల్లో డిమాండ్ సూచీ కనిష్ఠ స్థాయి నమోదైనప్పటికీ.. కొద్ది రోజులుగా స్థిరంగా కొనసాగుతోందని తెలిపింది. దీని ఫలితంగా.. 2020 చివరికి ఆర్థిక వ్యవస్థ 14 శాతం మేర క్షీణత నమోదవుతుందని వెల్లడించింది.
1706 తర్వాత అత్యల్పం.
బ్యాంకు వెల్లడించిన గణాంకాల ప్రకారం.. బ్రిటీష్ ఆర్థిక వ్యవస్థ వార్షిక క్షీణత రేటులో 1706 తర్వాత ఇదే అత్యల్పం. మొదటి ప్రపంచ యుద్ధం, స్పానిష్ ఫ్లూ వంటి విపత్కర పరిస్థితుల సమయంలో ఎదురైనా దానికంటే ఎక్కువగా ఉంటుందని పేర్కొంది బ్యాంకు. 2008-09 ప్రపంచ ఆర్థిక మాంద్యం సమయంలోని క్షీణతతో పోలిస్తే సుమారు 3 రేట్లు అధికంగా ఉంటుందని తెలిపింది.
అయితే.. కరోనా మహమ్మారిని ప్రపంచ దేశాలు త్వరితగతిన కట్టడి చేయగలిగితే బ్రిటీష్ ఆర్థిక వ్యవస్థ స్వల్ప కాలంలోనే కోలుకుంటుందని అభిప్రాయపడింది. వచ్చే ఏడాది నాటికి సుమారు 15 శాతం మేర కోలుకుంటుందని.. ఇది 1704 తర్వాత అత్యధిక వృద్ధి రేటుగా ఉంటుందని తెలిపింది బ్యాంకు.
వడ్డీ రేట్లను రికార్డ్ స్థాయిలో 0.1 శాతంతోనే కొనసాగించాలని, బాండ్ల కొనుగోలు విధానాన్ని విస్తరించాలని బ్యాంకు ద్రవ్య విధాన కమిటీ నిర్ణయించింది. ఈ నేపథ్యంలో ఔట్లుక్ను విడుదల చేసింది బ్యాంకు.
