అమెరికా-చైనా వాణిజ్య యుద్ధ భయాలున్నా స్టాక్ మార్కెట్లు నేడు లాభాలను నమోదు చేశాయి. వరుసగా తొమ్మిది సెషన్ల భారీ నష్టాల తర్వాత పదవ సెషన్లో సూచీలు మెరిశాయి.
బొంబాయి స్టాక్ ఎక్స్చేంజి సూచీ-సెన్సెక్స్ 228 పాయింట్లు బలపడింది. చివరకు 37,318 పాయింట్ల వద్ద స్థిరపడింది. జాతీయ స్టాక్ ఎక్స్చేంజి సూచీ-నిఫ్టీ 74 పాయింట్లు పుంజుకుని తిరిగి 11,200 స్థాయిని దాటింది. 11,222 వద్ద ట్రేడింగ్ ముగించింది.
ఇంట్రాడే సాగిందిలా
ఒడుదొడుకుల ట్రేడింగ్లో సెన్సెక్స్ 36,956.10 పాయింట్ల నుంచి 37,572.70 పాయింట్ల మధ్య కదలాడింది.
నిఫ్టీ ఇంట్రాడేలో 11,294.75 పాయింట్ల గరిష్ఠాన్ని తాకగా.. ఓ దశలో 11,108.30 పాయింట్ల కనిష్ఠానికి పడిపోయింది.
ఇవీ కారణాలు
ఫార్మా, ఆర్థిక, విద్యుత్ రంగాల సానుకూల ప్రభావం నేటి లాభాలకు ప్రధాన కారణం. ముఖ్యంగా సెన్సెక్స్లో హెవీ వెయిట్ షేర్లయిన రిలయన్స్, ఐటీసీ, ఎస్బీఐలు లాభాలకు ఊతమిచ్చాయని స్టాక్ నిపుణులు చెబుతున్నారు.
నేడు వెలువడిన టోకు ద్రవ్యోల్బణం గణాంకాలు సానుకూలంగా ఉండటమూ కలిసొచ్చింది. అమెరికా-చైనా వాణిజ్య యుద్ధ భయాలు మిడ్ సెషన్ తర్వాత ట్రేడింగ్పై అంతగా ప్రభావం చూపలేదని అభిప్రాయపడ్డారు నిపుణులు.
లాభనష్టాలు
సెన్సెక్స్లో సన్ ఫార్మా 5.87 శాతం, భారతీ ఎయిర్టెల్ 5.40 శాతం మేర భారీ లాభాలను ఆర్జించాయి. వేదాంత 4.08 శాతం, ఇండస్ఇండ్ బ్యాంకు 2.58 శాతం, ఎస్బీఐ 2.33 శాతం, రిలయన్స్ 2.33 శాతం, టాటా మోటార్స్ 2.27 శాతం లాభపడ్డాయి.
టెక్ దిగ్గజం టీసీఎస్ 1.72 శాతం, హెచ్సీఎల్ టెక్ 1.56 శాతం, బజాజ్ ఫినాన్స్ 1.52 శాతం, బజాజ్ ఆటో 0.92 శాతం, ఇన్ఫోసిస్ 0.86 శాతం, ఏషియన్ పెయింట్స్ 0.82 శాతం నష్టపోయాయి.
రూపాయి
ఇంట్రాడేలో రూపాయి 13 పైసలు పుంజుకుంది. డాలర్తో రూపాయి మారకం విలువ 70.38కి చేరింది.
ముడి చమురు
పశ్చిమాసియాలో నెలకొన్న రాజకీయ అనిశ్చితుల కారణంగా ముడి చమురు ధరల సూచీ బ్రెంట్ 0.94 శాతం పెరిగింది. బ్యారెల్ ముడి చమురు ధర 70.89 డాలర్లుగా నమోదైంది.
