షేర్ల బై బ్యాక్ అంశంపై ఇటీవల జరిగిన సమావేశంలో ఎలాంటి నిర్ణయం తీసుకోలేదని మైండ్ ట్రీ ప్రకటించింది. ఈ విషయంపై ఈనెల 26న మరోసారి సమావేశం కానున్నట్లు తెలిపింది. మైండ్ ట్రీని చేజిక్కించుకునేందుకు ఎల్ ఆండ్ టీ ప్రయత్నాలు ముమ్మరం చేసిన నేపథ్యంలో బోర్డు సమావేశంపై ఆసక్తి నెలకొంది.
మైండ్ ట్రీలో 31 శాతం వాటా కొనుగోలుకు ఈ వారం మొదట్లో రూ.10,800 కోట్లతో ఇంజనీరింగ్ దిగ్గజం ఎల్ అండ్ టీ చేసిన భారీ అఫర్ను మైండ్ ట్రీ డైరెక్టర్ల బోర్డు తిరస్కరించింది. లార్సెన్ టూబ్రో (ఎల్ అండ్ టీ) ప్రయత్నాలు అడ్డుకునేందుకు వాటాదార్లు సంస్థకు సహకరించాలని మైండ్ ట్రీ కోరింది. ఫలితంగా... షేర్ల బై బ్యాక్ అంశం తెరపైకి వచ్చింది.
ఇదీ నేపథ్యం
మైండ్ ట్రీ అనేది మధ్య రకపు ఐటీ కంపెనీ. ప్రమోటర్లు నడిపిస్తున్న కంపెనీగా పేరుంది. ఇందులో 21 శాతం వాటాతో కేఫ్ కాఫీ డే సంస్థ అధినేత సిద్ధార్థ 2018 వరకు డైరెక్టర్ల బోర్డులో ఉన్నారు.
2018లో కేఫ్ కాఫీ డే సంస్థలో నష్టాల కారణంగా మైండ్ట్రీలో అయనకున్న 21 శాతం వాటాను విక్రయించాలని నిర్ణయించుకున్నారు. ఈ వాటాల కొనుగోలు ద్వారా మైండ్ ట్రీ వ్యాపారంలోకి ప్రవేశించింది ఎల్అండ్ టీ.
ఇప్పటివరకు బాగానే ఉన్నా... ఎల్ అండ్ టీ వాటాను పెంచుకుని సంస్థను చేజిక్కించుకునేందుకు ప్రయత్నాలు మొదలు పెట్టింది.ఓపెన్ మార్కెట్లో మరో 15 శాతం వాటా కొనుగోలుకు బ్రోకర్లను సంప్రదించింది ఎల్ అండ్ టీ. మరో 31 శాతం వాటా కొనుగోలుకు మైండ్ ట్రీకి ఓపెన్ ఆఫర్ ప్రకటించింది. ఇలా సంస్థలో మొత్తం 66 శాతం వాటా కొనుగోలు చేయాలని ఎల్ అండ్ టీ భావించింది. ఇదే జరిగితే మెజారిటీ వాటా ఉన్నందున సంస్థ ఎల్ అండ్ టీ అధీనంలోకి వెళ్తుంది.
ఇది గ్రహించిన మైండ్ ట్రీ ఆత్మ రక్షణలో పడింది. సంస్థ చేతులు మారకుండా తీసుకోవాల్సిన చర్యలపై దృష్టి సారించింది.
ప్రస్తుతం మైండ్ట్రీ ప్రమోటర్ల చేతులో ఉన్న 13 శాతం వాటాతో ఎల్ అండ్ టీ ప్రయత్నాలను అడ్డుకోవడం అసాధ్యం. అందుకే సంస్థ దగ్గర ఉన్న నిధులతో బై బ్యాక్ అఫర్ ద్వారా మెజారిటీ వాటా దక్కించుకునే దిశగా ప్రయత్నాలు ముమ్మరం చేసింది.
సంబంధిత చట్టాలకు లోబడే ఈ ప్రయత్నాలు జరుగుతున్నాయని మైండ్ట్రీ ప్రమోటర్, సీఈఓ రాస్తవ్ రావనన్ ఓ ప్రకటనలో తెలిపారు.
