సంక్షోభంలో కూరుకుపోయిన ఎయిర్ఇండియాను(Air India disinvestment) కొనుగోలు చేసేందుకు బుధవారం.. వివిధ కంపెనీలు ఫినాన్షియల్ బిడ్లు దాఖలు చేసినట్లు ప్రభుత్వ వర్గాలు వెల్లడించాయి. బిడ్ల దాఖలుకు బుధవారమే తుది గడువని ఇదివరకే ప్రభుత్వం స్పష్టం చేసింది. ఈ నేపథ్యంలో ఇందుకు ఆసక్తిగా ఉన్న కంపెనీలు తమ బిడ్లను సమర్పించినట్లు తెలుస్తోంది.
ఫినాన్షియల్ బిడ్ దాఖలు చేసిన కంపెనీల జాబితాలో టాటా సన్స్ కూడా ఉన్నట్లు ఆ సంస్థ ప్రతినిధి ఒకరు వెల్లడించారు.
'ట్రాన్సాక్షన్ అడ్వైజర్ ద్వారా ఎయిర్ ఇండియా పెట్టుబడుల ఉపసంహరణకు సంబంధించిన ఫినాన్షియల్ బిడ్లు అందాయి. ఇక తదుపరి ప్రక్రియ ముగింపు దశకు చేరుకుంది' పార్ట్మెంట్ ఆఫ్ ఇన్వెస్ట్మెంట్ అండ్ పబ్లిక్ అసెట్ మేనేజ్మెంట్ (దీపమ్) ప్రతినిధి ఒకరు తెలిపారు.
ఆర్థిక సంక్షోభంలో కొట్టుమిట్టాడుతున్న ఎయిర్ఇండియాలో 100 శాతం వాటాను ప్రైవేటు పరం చేయాలని ప్రభుత్వం నిర్ణయించింది. నిజానికి.. 2018లో ఎయిర్ ఇండియాలో 76 శాతం వాటా విక్రయానికి ప్రభుత్వం ప్రయత్నించగా.. కొనుగోలుదారులు ముందుకు రాలేదు. ఈ నేపథ్యంలో 100 శాతం వాటా విక్రయానికి ప్రభుత్వం సిద్ధమైంది.
ఎయిర్ ఇండియాకు మొత్తం రూ.43 వేల కోట్ల మేరకు రుణాలు ఉన్నాయి. వీటిల్లో రూ.22 వేల కోట్ల రుణాలను ఎయిర్ ఇండియా అసెట్ హోల్డింగ్‌ లిమిటెడ్‌కు బదిలీ చేయనున్నారు. ఈ రుణాల చెల్లింపునకు ప్రభుత్వం గ్యారెంటీ ఇచ్చింది. అంటే సంస్థను వేరే వారికి బదిలీ చేసేనాటికి ప్రభుత్వం ఈ రుణాలు మొత్తం చెల్లించాల్సి ఉంది. ఈ అంశంపై ప్రభుత్వం ఎటువంటి ప్రతిపాదనలను బహిర్గతం చేయలేదు.
ఇదీ చదవండి: GST on Swiggy: స్విగ్గీ, జొమాటో సేవలపై జీఎస్టీ?
