భారీ అంచనాలు, ఆశల నడుమ నేడు పార్లమెంట్లో ప్రవేశపెట్టిన బడ్జెట్ను స్వాగతించాయి పారిశ్రామిక వర్గాలు. రియాల్టీ రంగం మాత్రం అసంతృప్తి వ్యక్తం చేసింది.
"సంపద సృష్టించే వారికి గౌరవం దక్కుతుందని ఆర్థిక మంత్రి చెప్పడం.. మొత్తం బడ్జెట్లోనే నాకు నచ్చిన విషయం. ఇది వ్యాపారాలకు మరింత ఉత్తేజాన్ని, వ్యాపారులకు ఆత్మవిశ్వాసాన్ని ఇస్తుంది. నవ భారత నిర్మాణానికి మరింత పట్టుదలతో పనిచేయాలన్న సంకేతాలు పంపిస్తుంది."
-సునీల్ భారతీ మిత్తల్, భారతీ ఎంటర్ప్రైజెస్ ఛైర్మన్
ఆర్థిక వృద్ధి పెంచేందుకు బడ్జెట్లో కేంద్రం దృష్టి సారించడం, పన్ను చెల్లింపుదారులపై వేధింపులకు స్వస్తి పలికే చర్యలు చేపట్టనున్నట్లు ప్రకటించడం పట్ల ఆనందం వ్యక్తం చేశారు బయోకాన్ సీఎండీ కిరణ్ మజుందార్ షా.
"ముందు చూపు, కార్యసాధకంగా బడ్జెట్ ప్రవేశపెట్టినందుకు ఆర్థిక మంత్రికి అభినందనలు. గతంలో మౌలిక సదుపాయాలకు ప్రకటించిన రూ.102 కోట్లు సమర్థంగా వినియోగించాల్సిన అవసరం ఉంది."
-అనిల్ అగర్వాల్, వేదాంత ఎగ్జిక్యూటివ్ ఛైర్మన్
ప్రజల పక్షంలో బడ్జెట్ ఉందని తిరుపుర్ ఎక్స్పోర్ట్స్ అసోసియేషన్ రాజా ఎం షణ్ముగం అన్నారు. మౌలిక సదుపాయాలకు చేసిన భారీ కేటాయింపులు.. లాజిస్టిక్ ధరలు తగ్గేందుకు తోడవుతాయని అభిప్రాయపడ్డారు.
'ఆర్థికవ్యవస్థ సవాళ్లను ఎదుర్కొనే విధంగా కేంద్రం బడ్జెట్ పవేశపెట్టింది. ఇందులో తీసుకున్న నిర్ణయాలు భారత్కు మరింత బలాన్నిస్తాయి.'
- టి.వి.నరేంద్ర, సీఎండీ, టాటాస్టీల్.
రియల్టీ రంగం అసంతృప్తి..
కేంద్ర బడ్జెట్ 2020 పట్ల రియాల్టీ రంగం అసంతృప్తి వ్యక్తం చేసింది. పద్దు ప్రగతిశీలంగా ఉన్నప్పటికీ రియాల్టీ రంగానికి ప్రత్యేకించి పెద్దగా ప్రోత్సాహకాలు రాలేదని క్రెడాయ్ జాతీయ అధ్యక్షుడు జాక్షయ్ షా అన్నారు.
అయితే.. సరసమైన గృహాల డిమాండ్ సరఫరాను పెంచడానికి పన్ను ప్రయోజనాల గడువు పెంచాలన్న ప్రభుత్వ నిర్ణయాలను ఆయన స్వాగతించారు.
ఇదీ చదవండి: ఆదాయపు పన్ను కొత్త విధానంలో పడే కోతలివే
