హాంగ్కాంగ్ ప్రజాస్వామ్య ఉద్యమకారులకు యాపిల్ సంస్థ మద్దతుగా నిలుస్తోందని ఆరోపించింది చైనా. ఇలాంటి నిర్లక్ష్యపు వైఖరితో అమెరికా టెక్ దిగ్గజం ఇబ్బందులు ఎదుర్కోవలసి వస్తుందని హెచ్చరించింది.
యాపిల్ స్టోర్లో 'హెచ్కే మ్యాప్.లైవ్' రవాణా యాప్ను అందుబాటులో ఉంచటంపై కమ్యూనిస్ట్ పార్టీ పత్రిక పీపుల్స్ డైలీలో సంపాదకీయం ప్రచురించింది. హాంగ్కాంగ్లో పోలీసుల జాడను నిరసనకారులు గుర్తించేందుకు ఇది ఉపయోగపడుతోందని ఆరోపించింది.
"ఈ యాప్కు యాపిల్ సంస్థ ఆమోదం తెలపటం వల్ల నిరసనకారులకు సహాయపడుతోంది. యాపిల్ సంస్థ అల్లరి మూకలకు అండగా ఉండాలని అనుకుంటోందా?"
- పీపుల్స్ డైలీ సంపాదకీయం
హాంగ్కాంగ్ స్వాతంత్య్రాన్ని సూచించే పాట.. దక్షిణ చైనా నగరంలోని యాపిల్ మ్యూజిక్ స్టోర్లో కనిపించిందని, దానిపైనా హెచ్చరికలు చేసినట్లు పేర్కొంది పీపుల్స్ డైలీ. హాంగ్కాంగ్ వ్యవహారంలోకి యాపిల్ను లాగడానికి ఎవరూ ఇష్టపడరని తెలిపింది. కానీ ఆ సంస్థ వ్యాపారాన్ని రాజకీయాలతో మిళితం చేస్తోందని, చట్టవిరుద్ధమైన చర్యలకు పాల్పడుతోందని ప్రజలు అనుకుంటున్నట్లు పేర్కొంది.
ఇదీ చూడండి: ట్రంప్ అభిశంసనకు సహకరించబోం: శ్వేతసౌధం
