'మోటార్ వాహనాల నిబంధనలు-1989' చట్టంలో కేంద్రం కీలక సవరణలను నోటిఫై చేసింది. వాహన యాజమానులు నామినీని ఎంచుకునే వెసులుబాటును తీసుకొచ్చింది. దీనితో ఏదైనా కారణం వల్ల యాజమాని మరణిస్తే.. ఆ వాహన రిజిస్ట్రేషన్ నామినీకి బదలాయింపు అవనుంది.
వాహనం రిజిస్ట్రేషన్ సమయంలోనే యాజమాని.. నేరుగా నామినీ పేరును నమోదు చేయొచ్చు. రిజిస్ట్రేషన్ అనంతరం ఆన్లైన్లో కూడా ఇందుకు దరఖాస్తు చేసుకోవచ్చు. దీనికోసం నామినీకి సంబంధించిన గుర్తింపు ధ్రువపత్రాన్ని సమర్పించాల్సి ఉంటుంది.
ఈ ప్రక్రియ దేశవ్యాప్తంగా వేరువేరుగా ఉంటుందని రోడ్డు రవాణా మంత్రిత్వ శాఖ పేర్కొంది.
ఇతర వివరాలు..
- యాజమాని మరణానంతరం నామినీకి హక్కుల బదలాయింపు ప్రక్రియకు మూడు నెలల వరకు సమయం పట్టొచ్చు.
- యాజమాని మరణించిన 30 రోజుల్లోపు నామినీ సంబంధిత అధికారులను.. రిజిస్ట్రేషన్ ధ్రువపత్రాలతో సంప్రదించాల్సి ఉంటుంది.
- విడాకులు, ఆస్తి పంపకాల వంటి కారణాలతో వాహన యాజమాని నామినీని మార్చుకునే వీలుంది. స్టాండర్డ్ ఆపరేటింగ్ ప్రొసిజర్ (ఎస్ఓపీ)ను అంగీకరించి నామినీని మార్చుకోవచ్చు.
