స్టాక్ మార్కెట్ల వరుస లాభాల జోరుతో మదుపరుల సంపద రికార్డు స్థాయిలో పెరిగింది. దాదాపు అన్ని రంగాలు భారీగా పుంజుకున్న కారణంగా బీఎస్ఈ-సెన్సెక్స్ 60 వేల మార్క్ దాటింది. మంగళవారం సెషన్లో సూచీలు కాస్త వెనక్కి తగ్గినప్పటికీ.. చాలా కంపెనీల షేర్లు రికార్డు గరిష్ఠాల వద్ద ఉన్నాయి.
స్టాక్ మార్కెట్ల రికార్డు లాభాలతో గత నెల రోజుల్లో భారీగా లాభాలను గడించిన వారిలో.. బిగ్ బుల్ రాకేశ్ ఝున్ఝున్వాలా పేరు ముందుగా చెప్పుకోవాలి. ఎందుకంటే ఆయన కేవలం రెండు కంపెనీల్లో పెట్టుబడుల ద్వారా.. నెల రోజుల్లో దాదాపు రూ.900 కోట్ల లాభాన్ని గడించారు.
పంట పండించిన షేర్లు ఇవే..
టాటా మోటార్స్, టైటాన్ కంపెనీ షేర్లలో రాకేశ్ ఝున్ఝున్వాలాకు భారీగా పెట్టుబడులున్నాయి. గత నెల రోజుల్లో టాటా మోటార్స్ షేర్లు 13 శాతం పుంజుంకున్నాయి. టైటాన్ కంపెనీ షేర్లు 11.40 శాతం పెరిగాయి. ఫలితంగా ఈ స్థాయిలో ఝున్ఝున్వాలా సంపద పెరిగింది.
టాటా మోటార్స్లో వాటాలు ఇలా..
ఈ ఏడాది ఏప్రిల్-జూన్ త్రైమాసిక డేటా ప్రకారం.. టాటా మోటార్స్లో 3,77,50,000 షేర్లు బిగ్ బుల్ పేరు మీద ఉన్నాయి. ఈ నెల ఆరంభంలో రూ.287.30 వద్ద ఉన్న కంపెనీ షేరు విలువ.. రూ.331 పెరిగింది. అంటే ఒక్కో షేరు రూ.43.70 లాభం తెచ్చి పెట్టింది.
ఈ లెక్కల ప్రకారం.. రాకేశ్ ఝున్ఝున్వాలా ఈ నెలలోనే టాటా మోటార్స్ షేర్ల ద్వారా దాదాపు రూ.165 కోట్ల లాభాన్ని ఆర్జించారు.
టైటాన్లో వాటాలు వివరాలు..
ఏప్రిల్-జూన్ త్రైమాసిక గణాంకాల ఆధారంగా టైటాన్ కంపెనీలో బిగ్ బుల్ రాకేశ్ ఝున్ఝున్వాలా 3,30,10,395 షేర్లు కలిగి ఉన్నట్లు తెలిసింది. ఆయన భార్య రేఖా ఝున్ఝున్వాలా పేరుమీద 96,40,575 షేర్లున్నట్లు వెల్లడైంది. అంటే టైటాన్లో మొత్తం 4,26,50,970 షేర్లు ఝున్ఝున్వాలా దంపతుల పేరు మీదున్నాయి.
టైటాన్ షేరు విలువ ఈ నెల ఆరంభంలో రూ.1,921.60 వద్ద ఉండగా.. ఇప్పుడు రూ.2092.50కి వద్దకు పెరిగింది. ఒక్కో షేరు రూ.170.90 లాభాన్ని ఇచ్చింది. మొత్తం మీద టైటాన్ షేర్ల వృద్ధితో రాకేశ్ ఝున్ఝున్వాలా రూ.728.90 కోట్లు గడించారు.
రెండు కంపెనీల షేర్ల ద్వారా రాకేశ్ ఝున్ఝున్వాలా సంపద నెల రోజుల్లోనే రూ.893.87 కోట్లు ఎగిసింది.
రాకేశ్ ఝున్ఝున్వాలాకు మొత్తం 38 కంపెనీల్లో షేర్లు ఉన్నాయి. వీటి విలువ దాదాపు రూ.21,897 కోట్లు. ఆయన మొత్తం ఆస్తి విలువ రూ.35వేల కోట్ల పైమాటే.
ఇవీ చదవండి:
