ప్రముఖ పెట్టుబడిదారుడు రాకేశ్ ఝున్ఝున్వాలా పట్టిందల్లా బంగారం అవుతోంది. ఇండియా బుల్స్ హౌసింగ్ ఫినాన్స్ లిమిటెడ్లో ఆయన తాజాగా కోటి షేర్లు కొనుగోలు చేశారు. బీఎస్ఈ డేటా ప్రకారం.. ఇండియా బుల్స్ హౌసింగ్ ఫినాన్స్ లిమిటెడ్లో.. రాకేశ్ ఝున్ఝున్వాలా వాటా 2.17 శాతానికి పెరిగింది.
కోటి షేర్ల కొనుగోలు వార్తలతో.. ఎన్ఎస్ఈలో ఇండియా బుల్స్ హౌసింగ్ ఫినాన్స్ లిమిటెడ్ షేరు విలువ 3.42 శాతం (రూ.9.10) పెరిగి.. రూ.275.30 వద్దకు చేరింది. ఈ కంపెనీ షేరు ఏడాది కాలంలో దాదాపు 25 శాతం పుంజుకుకోవడం గమనార్హం.
కంపెనీ వివరాలు..
ఇండియాబుల్స్ హౌసింగ్ ఫినాన్స్ లిమిటెడ్ దేశంలో ప్రధాన హోంలోన్ కంపెనీల్లో ఒకటి. ఇది ఇండియా బుల్స్ గ్రూప్నకు చెందిన అనుబంధ సంస్థ. చౌక వడ్డీ రేట్లకే రుణాలు ఇచ్చే సంస్థగానూ దీనికి గుర్తింపు ఉంది.
రాకేశ్ ఝున్ఝున్వాలా గురించి..
దేశ స్టాక్ మార్కెట్ గురించి చర్చ వస్తే.. రాకేశ్ ఝున్ఝున్వాలా గురించి తప్పకుండా మాట్లాడుకోవాల్సిందే. అంతలా ఆయనకు గుర్తింపు ఉంది. అందుకే.. ఆయన్ను అందరూ 'బిగ్బుల్'గా పిలుస్తారు.
మార్కెట్ డేటా ప్రకారం.. రాకేశ్ ఝున్ఝున్వాలా ఫినాన్స్, టెక్, రిటైల్, ఫార్మా రంగాల్లో అధికంగా పెట్టుబడులు పెట్టారు. ట్రెండ్లైన్ నివేదిక ప్రకారం.. ఆయనకు మొత్తం 36 స్టాక్స్లో (కంపెనీలు) దాదాపు రూ.18,867 కోట్లు విలువైన పెట్టుబడులు ఉన్నాయి.
ఇదీ చదవండి:ఈ 6 సూత్రాలతో.. మీ డబ్బులకు డబ్బులు కాస్తాయి
