ప్యాసింజర్ వాహనాల రిటైల్ విక్రయాలు మరోసారి భారీగా పతనమయ్యాయి. కరోనా 2.O సెగతో మే నెలలో మొత్తం 85,733 యూనిట్లు మాత్రమే అమ్ముడైనట్లు ఆటోమొబైల్ డీలర్ల సమాఖ్య(ఫాడా) గురువారం వెల్లడించింది. ఏప్రిల్తో (2,08,883 యూనిట్లు) పోలిస్తే ఈ మొత్తం 59శాతం తక్కువని పేర్కొంది.
ఫాడా గణాంకాలు
- ద్విచక్ర వాహనాల రిటైల్ విక్రయాలు కూడా (ఏప్రిల్తో పోలిస్తే) మే నెలలో 53 శాతం తగ్గాయి. గత నెల 4,10,757 యూనిట్లు అమ్ముడయ్యాయి. ఏప్రిల్లో ఈ సంఖ్య 8,65,134 గా ఉంది.
- వాణిజ్య వాహనాల రిటైల్ విక్రయాలు కూడా గత నెల ఏకంగా 66 శాతం క్షీణించాయి. మొత్తం 17,534 యూనిట్లు అమ్ముడయ్యాయి. ఏప్రిల్లో 51,436 వాణిజ్య వాహనాలు విక్రయమయ్యాయి.
- త్రిచక్ర వాహనాల విక్రయాలు ఏప్రిల్తో పోలిస్తే మేలో అత్యధికంగా 76 శాతం పడిపోయాయి. 5,215 యూనిట్లు మాత్రమే గత నెల అమ్ముడయ్యాయి.
- మేలో ట్రాక్టర్ల విక్రయాలు కూడా 57 శాతం తగ్గి.. 16,616 యూనిట్లకు పరిమితమయ్యాయి. ఏప్రిల్లో 38,285 ట్రాక్టర్లు విక్రయమయ్యాయి.
- అన్ని క్యాటగిరీల వారీగా వాహనాల రిజిస్ట్రేషన్లు మేలో 55 శాతం (5,35,855 యూనిట్లకు) తగ్గాయి. ఏప్రిల్లో ఈ సంఖ్య 11,85,374 గా ఉంది.
