2022 కొత్త ఏడాదిలో మొదటి నెల పూర్తయి రెండో నెలలోకి అడుగుపెడుతున్నాం. అయితే, ఫిబ్రవరి 1వ తేదీ నుంచి సామాన్యుడిని ప్రభావితం చేసే బ్యాంకింగ్ నిబంధనలు, ఎల్పీజీ ధరల్లో మార్పులు జరగనున్నాయి. అవేంటో ఓసారి పరిశీలిద్దాం..
ఎస్బీఐ ఐఎంపీఎస్ ఛార్జీల్లో మార్పు..
SBI imps rates: ప్రభుత్వ రంగ బ్యాంకింగ్ దిగ్గజం స్టేట్ బ్యాంక్ ఆఫ్ ఇండియా(ఎస్బీఐ).. కస్టమర్లకు శుభవార్త అందించింది. డిజిటల్ ఇమీడియట్ పేమెంట్స్ సర్వీస్(ఐఎంపీఎస్) లావాదేవీల్లో రూ.5 లక్షల వరకు ఎలాంటి సేవా రుసుములు చెల్లించాల్సిన అవసరం లేదని ప్రకటించింది. ఈ కొత్త నిబంధనలు 2022, ఫిబ్రవరి 1న అమలులోకి వస్తాయని తెలిపింది. ఎస్బీఐ వినియోగదారులు.. నెట్ బ్యాంకింగ్, మొబైల్ బ్యాంకింగ్, యోనో యాప్ ద్వారా రూ.5 లక్షల వరకు ఉచితంగా ఐఎంపీఎస్ సేవలను పొందవచ్చు. గతంలో ఉచిత చెల్లింపులు రూ.2 లక్షల వరకే అందించగా.. డిజిటల్ చెల్లింపులను ప్రోత్సహించేందుకు రూ.5 లక్షల వరకు పెంచినట్లు తెలిపింది బ్యాంక్.
బ్యాంక్ బ్రాంచ్ ద్వారా చెల్లిస్తే..
ఏదైనా ఎస్బీఐ బ్యాంక్ శాఖ ద్వారా ఐఎంపీఎస్ చెల్లింపులు చేస్తే.. ప్రస్తుతం ఉన్న స్లాబ్ల ప్రకారమే సేవా రుసుములు ఉంటాయని, ఎలాంటి మార్పులు చేయటం లేదని స్పష్టం చేసింది. అయితే.. రూ.2 లక్షల నుంచి రూ.5 లక్షల వరకు చెల్లింపుల స్లాబ్ను కొత్తగా తీసుకొచ్చింది ఎస్బీఐ. దీనికి రూ.20+ జీఎస్టీ చెల్లించాల్సి ఉంటుంది. ఈ నిబంధన ఫిబ్రవరి 1న అమలులోకి రానుంది.
ప్రస్తుతం బ్యాంక్ శాఖ ద్వారా రూ.వెయ్యిలోపు ఐఎంపీఎస్ చెల్లింపులకు ఎలాంటి ఛార్జీలు లేవు. రూ.1000 నుంచి రూ.10వేల లోపు చెల్లింపులకు రూ.2+జీఎస్టీ, రూ.10వేల నుంచి రూ.లక్షలోపు చెల్లింపులకు రూ.4+ జీఎస్టీ, రూ.లక్ష నుంచి రూ.2 లక్షల వరకు రూ.12+జీఎస్టీ, రూ.2 లక్షల నుంచి రూ.5 లక్షల వరకు రూ. 20+జీఎస్టీ సేవా రుసుములు చెల్లించాల్సి ఉంటుంది.
ఎల్పీజీ సిలిండర్ ధర పెంపు?
LPG Price: ప్రతి నెల తొలి రోజున ఎల్పీజీ సిలిండర్ ధరలపై సమీక్ష సమావేశం నిర్వహిస్తాయి చమురు సంస్థలు. ప్రస్తుత పరిస్థితుల్లో వంట గ్యాస్ ధరలను పెంచే అవకాశాలు భారీగా కనిపిస్తున్నాయి. అందుకు అంతర్జాతీయ మార్కెట్లో చమురు ధరల్లో పెరుగుదల కనిపించటం ఒక కారణం కావచ్చు. మరోవైపు.. ఐదు రాష్ట్రాల్లో అసెంబ్లీ ఎన్నికలు ఉన్న క్రమంలో మోదీ ప్రభుత్వం గ్యాస్ ధరలను తగ్గించే అవకాశాలు ఉన్నాయనే ఊహాగానాలు సైతం వినిపిస్తున్నాయి.
ప్రస్తుతం దేశ రాజధాని దిల్లీలో గృహవినియోగ ఎల్పీజీ సిలిండర్ ధర రూ.899.50గా ఉంది. కోల్కతాలో రూ.926, ముంబయిలో రూ.899.50, చెన్నైలో రూ.915.50గా ఉంది. వాణిజ్య సిలిండర్ ధర దిల్లీలో రూ.1998.50, కోల్కతాలో రూ.2,076, ముంబైలో రూ.1,948.50, చెన్నైలో రూ.2,131గా ఉంది.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చూడండి: Budget 2022: కొవిడ్‌ అస్థిరతకు బడ్జెట్‌ మాత్ర
