ఈ-కామర్స్ రంగంలోకి ఫేస్బుక్ అనుబంధ సంస్థ ఇన్స్టాగ్రామ్ అడుగుపెట్టనుంది. దీనికోసం యాప్లో కొత్తగా 'చెక్అవుట్' ఆప్షన్ను అందుబాటులోకి తెస్తోంది. దీనితో వినియోగదారులు తమకు నచ్చిన బ్రాండ్ల ఉత్పత్తులను కొనుగోలు చేసుకోవచ్చు.
"ఇన్స్టాగ్రామ్లో కొత్తగా చెక్అవుట్ ఆప్షన్ను ప్రవేశ పెట్టాం. ఇకపై మీకు నచ్చిన వస్తువులు,యాప్లోనే కొనుగోలు చేయొచ్చు" -ఫేస్బుక్ , సిలికాన్ వ్యాలీ శాఖ.
ఈ చెక్అవుట్ ఆప్షన్ ఇంకా పూర్తి స్థాయిలో అందుబాటులోకి రాలేదు. దీనికి సంబంధించి అమెరికాలో బీటా వర్షన్ యాప్ను పరిశీలిస్తున్నారు.
ఎలా పనిచేస్తుంది:
చెక్ అవుట్ బటన్ మీద క్లిక్ చేసి మనకు కావాల్సిన వస్తువులను ఎంపిక చేసుకోవచ్చు. వాటి సైజు, రంగు ఎంచుకుని తర్వాత చెల్లింపులు జరిపే విధంగా దీనిని తీర్చిదిద్దారు.
ఇంతకు ముందు ఇన్స్టాలో కనిపించే వస్తువులను వాటి వెబ్సైట్ లింకుల ఆధారంగా కొనుగోళ్లు జరిపేవారు. ఇప్పుడు చెక్అవుట్ ఆప్షన్ పూర్తి స్థాయిలో అందుబాటులోకి వస్తే అ అవసరం ఉండదని ఫేస్బుక్ వర్గాలు తెలిపాయి.
సమాచారం భద్రపరుస్తాం:
మొదటిసారి కొనుగోలు జరిపేటప్పుడు మనం ఇచ్చిన సమాచారాన్ని భవిష్యత్ అవసరాల కోసం భద్రపరచనున్నట్లు తెలిపింది ఇన్స్టాగ్రామ్.
అయితే ఇది గతంలో ఫేస్బుక్ పై వచ్చిన వ్యక్తిగత వివరాల చోరి లాంటి వివాదాలకు దారి తీసే అవకాశం ఉంది. దీనికి వినియోగదారులు ఎలా స్పందిస్తారో వేచి చూడాలి.
ప్రఖ్యాత బ్రాండ్ల ఉత్పత్తులు:
అడిడాస్, బుర్బెర్రి, హెచ్ అండ్ ఎమ్ లాంటి ప్రఖ్యాత బ్రాండ్ల ఉత్పత్తులు ఇన్స్టాలో లభించనున్నాయి.