భారత్​లో పసిడికి భారీగా పెరిగిన డిమాండ్​

దేశంలో బంగారానికి విపరీతంగా డిమాండ్​ పెరిగినట్లు ప్రపంచ పసిడి మండలి(డబ్ల్యూజీసీ) నివేదికలో పేర్కొంది. ఆర్థిక వ్యవస్థ మెరుగైన పనితీరుతో పసిడి కొనుగోళ్లు పెరిగి.. సాధారణ స్థాయికి చేరుకున్నట్లు వెల్లడించింది.

భారత్​లో పసిడికి డిమాండ్​ భారీగా పెరిగినట్లు ప్రపంచ పసిడి మండలి (డబ్ల్యూజీసీ) తెలిపింది. కరోనా పరిస్థితులు మెరుగుపడి, ఆర్థిక కార్యకలాపాలు బలంగా పుంజుకోవడం వంటివి పసిడి అమ్మకాల వృద్ధికి దోహదం చేశాయని వెల్లడించింది. దీంతో కరోనా ముందు నాటి సాధారణ పరిస్థితులకు పడిసి డిమాండ్​ చేరుకుందని డబ్ల్యూజీసీ తన నివేదికలో పేర్కొంది.

47శాతం పెరిగిన డిమాండ్​

• ఈ ఏడాది సెప్టెంబరు ముగింపు త్రైమాసికానికి పసిడి డిమాండ్​ 47 శాతం పెరిగి.. 139.1 టన్నులకు చేరుకుంది. ఇది 2020లో ఇదే సమయానికి 94.6 టన్నులుగా ఉంది.
• విలువ పరంగా చూస్తే.. భారత్​లో 2020లో బంగారం డిమాండ్​ రూ.43,160 కోట్లుగా ఉంది. 2021లో ఇది 37శాతం పెరిగి రూ.59,330 కోట్లకు చేరుకుంది.
• ఆభరణాల విషయానికొస్తే.. 2020తో పోల్చితే డిమాండ్ 58 శాతం పెరిగి 96.2 టన్నులకు చేరింది. ఇది గతేడాది 68.8 టన్నులుగా ఉంది.
• విలువ పరంగా చూస్తే.. 2020తో పోల్చితే 48 శాతం పెరిగి రూ.41,030 కోట్లకు ఎగబాకింది. ఏడాది క్రితం ఇదే త్రైమాసికంలో రూ.27,750 కోట్లుగా ఉంది.
• బంగారంపై పెట్టుబడి డిమాండ్​ గతేడాదితో పోల్చితే.. 27 శాతం పెరిగి 42.9 టన్నులకు చేరుకుంది. విలువ పరంగా.. 19 శాతం పెరిగి రూ.18,300 కోట్లకు చేరుకుంది.
• పన్నులు లేకుండా మొత్తం నికర బులియన్ దిగుమతులు 187 శాతం పెరిగి 255.6 టన్నులకు చేరుకున్నాయి. ఇది 2020 ఇదే త్రైమాసికంలో 89 టన్నులుగా ఉంది.
• దేశంలో రీసైకిల్ చేసిన మొత్తం బంగారం 50 శాతం క్షీణించి 20.7 టన్నులకు తగ్గింది. గతేడాది ఇదే కాలంలో 41.5 టన్నులుగా ఉంది.

7 శాతం తగ్గిన గోల్డ్​ ఈటీఎఫ్‌

2020 జులై-సెప్టెంబర్​ త్రైమాసికంతో పోలిస్తే 2021లో అంతర్జాతీయంగా పసిడి డిమాండ్​ 7 శాతం తగ్గి.. 831 టన్నులకు పడిపోయినట్లు డబ్ల్యూజీసీ నివేదికలో పేర్కొంది. ఇది 2020లో 894.4 టన్నులుగా ఉంది. గోల్డ్​ బ్యాక్డ్ ఎక్స్ఛేంజ్‌ ట్రేడెడ్‌ ఫండ్‌ (గోల్డ్​ ఈటీఎఫ్‌) నుంచి ప్రవాహాలే ఇందుక కారణమని తెలిపింది.

• నికర గోల్డ్​ ఈటీఎఫ్ అమ్మకాలు గతేడాదితో పోల్చితే స్వల్పంగా (27 టన్నులు) తగ్గాయి. 2020లో ఇదే సమయంలో పసిడి అమ్మకం 274 టన్నులుగా ఉంది.
• ఆభరణాల విషయానికి వస్తే.. పసిడికి 33 శాతం డిమాండ్​ పెరిగి.. 443 టన్నులకు చేరింది. 2020లో ఇదే సమయంలో 333టన్నులుగా ఉంది.
• టెక్నాలజీలో బంగారం వినియోగం 9శాతం పెరిగి 83.8టన్నులకు చేరింది. 2020లో 77.2 టన్నులుగా ఉంది.
• పసిడి ఉత్పత్తి రికార్డు స్థాయిలో పెరిగినప్పటికీ.. సరఫరా 3 శాతం తగ్గి 1,239 టన్నులకు చేరింది. గతేడాది 1,279.4 టన్నులుగా ఉంది.
• బంగారం రీసైక్లింగ్ గణనీయంగా తగ్గడం వల్ల అంతర్జాతీయంగా బంగారం ధరలు తగ్గాయి.

ఇదీ చూడండి: Credit Card: రెండో క్రెడిట్‌ కార్డు ఎప్పుడు తీసుకోవాలి?