నిరుద్యోగులకు గుడ్ న్యూస్. దేశంలోని ప్రభుత్వ రంగ బ్యాంకుల్లో క్లర్క్ పోస్టులకు నోటిఫికేషన్ విడుదల చేసింది ఐబీపీఎస్. అక్టోబర్ 7 నుంచి దరఖాస్తులు స్వీకరిస్తున్నట్లు నోటిఫికేషన్లో పేర్కొంది. మొత్తం 5,830 పోస్టులకు గానూ ఈ నోటిఫికేషన్ విడుదలైంది.
నిజానికి నెల క్రితమే ఈ నోటిఫికేషన్ వెలువడాల్సి ఉంది. వివిధ కారణాలతో ఆలస్యంగా ఈ ప్రక్రియను ప్రారంభించింది ఐబీపీఎస్.
ఇంకో గుడ్ న్యూస్ ఏమిటంటే.. ఈ సారి పరీక్ష ప్రాంతీయ భాషల్లోనూ ఉండనుంది. గత ఏడాది ఇంగ్లిష్, హిందీ భాషల్లో మాత్రమే పరీక్షను నిర్వహించింది ఐబీపీఎస్. ఆర్థిక శాఖ చొరవతో.. ఈసారి ప్రిలిమ్స్, మెయిన్స్ రెండు పరీక్షలను 13 స్థానిక భాషల్లో నిర్వహించేందుకు సిద్ధమైంది.
క్లర్క్ నియామక ప్రక్రియ పూర్తిగా ఆన్లైన్ ద్వారా జరగనుందని ఐబీపీఎస్ పేర్కొంది. ఎంపిక విధానం ప్రిలిమ్స్, మెయిన్స్ పరీక్షా ఫలితాల ఆధారంగా ఉండనుంది. ఈ పోస్టులకు ఇంటర్వ్యూ లేదు.
అర్హతలు..
ఏదైన డిగ్రీ పట్టా, కంప్యూటర్ పరిజ్ఞానం ఉండాలి. రాష్ట్రాలు, కేంద్ర పాలిత ప్రాంతాల్లో స్థానిక భాషల్లో మాట్లాడటం, చదవటం, రాయటం వచ్చి ఉండాలి. కంప్యూటర్ కోర్సుకు సంబంధించి సర్టిఫికేట్ తప్పనిసరి.
వయో పరిమితి
ఈ పోస్టులకు దరఖాస్తు చేసే అభ్యర్థులకు 2021 జులై 1 నాటికి కనీసం 20 ఏళ్లు నిండి ఉండాలి. గరిష్ఠంగా వయో పరిమితి 28 ఏళ్లు. రిజర్వేషన్ కోటా అభ్యర్థులకు వయో పరిమితిలో సడలింపులు ఉంటాయి.
దరఖాస్తు ఇలా..
జులైలో క్లర్క్ పోస్టులకు దరఖాస్తు చేసుకున్నవారు మళ్లీ అప్లై చేయాల్సిన అవసరం లేదని ఐబీపీఎస్ వెల్లడించింది.
కొత్తగా అప్లై చేయాలంటే..
1. ఐబీపీఎస్ అధికారిక వెబ్సైట్లోకి లాగిన్ అవ్వాలి
2. హోం పేజీలో 'Apply for Bank Clerks' పై క్లిక్ చేయాలి..
3. రిజిస్ట్రేషన్ ఆప్షన్ పై క్లిక్ చేసి.. అందులో అడిగిన అన్ని వివరాలు సమర్పించాలి.
4. అప్లికేషన్ ఫారం పూర్తిగా నింపి.. కావాల్సిన డాక్యుమెంట్లను అప్లోడ్ చేయాలి. ఫొటో, సంతకం, ఎడమ చేతి బొడనవేలి ముద్ర, రాతపూర్వక డిక్లరేషన్ వంటివి స్కాన్ చేసి అప్లోడ్ చేయాల్సి ఉంటుంది.
5. దరఖాస్తు పూర్తి చేసిన తర్వాత.. ఓ కాపీని భవిష్యత్ అవసరాల కోసం సేవ్ చేసుకోవాలి.
ఫీజు ఎంత?
రిజర్వేషన్ లేని అభ్యర్థులు రూ.850 దరఖాస్తు రుసుముగా చెల్లించాలి. రిజర్వేషన్ ఉన్న వాళ్లు రూ.175 చెల్లించాల్సి ఉంటుంది.
అధికారిక వెబ్సైట్లో పూర్తి వివరాలను క్షణ్నంగా చదివిన తర్వాతే దరఖాస్తు చేయడం ఉత్తమం.
ఇదీ చదవండి: టెలికాం రంగంలో 100% ఎఫ్డీఐ- నోటిఫై చేసిన కేంద్రం
