ఎయిర్ఇండియాలో వాటా విక్రయ నిమిత్తం చేపట్టిన బిడ్‌ల దాఖలు ప్రక్రియకు గడువు తేదీని ప్రభుత్వం మళ్లీ పొడిగించింది. జూన్ 30 వరకు బిడ్లు దాఖలు చేసేందుకు అవకాశం కల్పించింది. కరోనా వైరస్‌ పరిణామాల నేపథ్యంలో ప్రపంచవ్యాప్తంగా ఆర్థిక కార్యకలాపాలు నిలిచిపోవడం వల్ల ఈ నిర్ణయం తీసుకుంది. బిడ్‌ల దాఖలుకు గడువు తేదీని ప్రభుత్వం పొడిగించడం ఇది రెండో సారి కావడం గమనార్హం.
ఈ ఏడాది జనవరి 27న ఎయిరిండియాలో వాటా విక్రయ ప్రక్రియను ప్రారంభిస్తూ.. ఆసక్తి ఉన్న కొనుగోలుదార్లు బిడ్లు దాఖలు చేసేందుకు మార్చి 18 వరకు గడువు ఇచ్చింది. ఆ తర్వాత మళ్లీ ఆ తేదీని ఏప్రిల్ 30కి పొడిగించింది. ఇప్పుడు జూన్ 30 వరకు అవకాశం కల్పిస్తూ పెట్టుబడులు, ప్రభుత్వ ఆస్తుల నిర్వహణ విభాగం నిర్ణయం తీసుకుంది.
ఇదీ చూడండి:లాక్డౌన్లో భారీగా పెరిగిన పీఎఫ్ ఉపసంహరణలు
