స్పీడ్ ఇంటర్నెట్ సేవలు అందుబాటులోకి వచ్చాక ఏ చిన్న సందేహం వచ్చినా ముందుగా గుర్తొచ్చేది గూగుల్. మనకు కావాల్సిన ఎలాంటి సమాచారం అయిన గూగుల్‌లో సెర్చ్ చేసి ఇట్టే తెలుసుకోవచ్చు. పాఠశాల విద్యార్ధుల నుంచి ఇంట్లో ఉండే తాత, బామ్మల వరకు గూగుల్ గురించి తెలియని వారులేరు. అంతలా పాపులర్ అయిన సెర్చ్ ఇంజిన్‌ను స్థాపించి నిన్నటితో 22 ఏళ్లు పూర్తయ్యాయి. ఈ సందర్భంగా గూగుల్ ప్రత్యేకమైన డూడుల్‌ను సెర్చ్ ఇంజిన్ హోం పేజిలో ఉంచింది. ఇందులో గూగుల్‌లోని జీ అనే అక్షరానికి మిగిలిన అక్షరాలకు మధ్య వీడియో కాల్ జరుగుతున్నట్లుగా చూపించారు. కొవిడ్‌-19 పరిస్థితుల్లో కూడా వీడియో కాల్ ద్వారా ప్రజలు బర్త్‌డేలు జరుపుకొంటున్నారని చెప్పడం డూడుల్ ఉద్దేశం. అయితే ఈ సందర్భంగా గూగుల్కు ఆపేరు ఎలా వచ్చింది..దాన్ని స్థాపించాలనే ఆలోచనకు ఎక్కడ బీజం పడింది వంటి ఆసక్తికర విషయాలను ఈ సందర్భంగా గూగుల్ షేర్‌ చేసింది. మరి అవేంటో తెలుసుకుందామా...
స్టాన్‌ఫోర్డ్‌ యూనివర్శిటీ క్యాంపస్‌లో గ్రాడ్యుయేట్‌ విద్యార్ధులుగా ఉన్న సమయంలో లారీ పేజ్‌, సెర్గేయ్‌ బ్రిన్‌లకు వచ్చిన ఒక సరికొత్త ఆలోచన గూగుల్కు బీజం వేసింది. ఆ రోజుల్లో వరల్డ్‌ వైడ్‌ వెబ్‌ (WWW)లో సమాచారం కోసం ప్రజలు వెతికే విధానాన్ని మరింత మెరుగుపరచాలని ఇద్దరు నిర్ణయించుకున్నారు. దాని కోసం ఒక సంస్థను స్థాపించాలనుకున్నారు. అలా 1998 సెప్టెంబరు 27 తేదీన లారీ, బ్రిన్‌ ఇద్దరు కలిసి గూగుల్‌ను ప్రారంభించారు. మరి పేరు ఎలా వచ్చిందంటే...
1920లో ఒక రోజు అమెరికన్‌ గణిత శాస్త్రవేత్త ఎడ్వర్డ్‌ కాస్నర్ తన మేనల్లుడు మిల్టన్‌ సిరోట్టాతో 1 తర్వాత వంద సున్నాలు ఉండే అంకెను ఎలా పిలవాలో సూచించమని కోరాడట. అందుకు మిల్టన్‌ గూగోల్ (Googol) అని సమాధానం ఇచ్చాడట. తర్వాత ఆ పదాన్ని కాస్నర్ 1940లో తాను ఉపరచయితగా వ్యవహరించిన ‘మేథమెటిక్స్‌ అండ్ ఇమేజినేషన్‌’ అనే పుస్తకంలో ప్రస్తావించారు. 1998లో లారీ, బ్రిన్‌లు తమ కంపెనీకి పేరు పెట్టడం కోసం వెతుకుతున్నప్పుడు గూగోల్ గురించి విన్నారట. ఆ పేరు వారికి ఎంతో నచ్చడంతో అందులో కొద్దిగా మార్పులు చేసి గూగుల్ అని పెట్టారట. అంటే సమాచార అన్వేషణకు అంతు లేదు అనేది పేరు వెనక ఉద్దేశం. తర్వాతి కాలంలో ఆ పదం ఎంత పాపులర్ అయిందో అందరికి తెలిసిందే. 2006లో అధికారికంగా గూగుల్ అనే పదాన్ని ఆక్స్‌ఫర్డ్‌ డిక్షనరీలో చేర్చారు.
