హోల్ సేల్ వాహన విక్రయాలపై పండుగ సీజన్ సానుకూల ప్రభావం చూపినట్లు భారత వాహన తయారీదారుల సంఘం (సియామ్) తెలిపింది. పండుగల నేపథ్యంలో గత నెల ప్యాసింజర్ వాహన విక్రయాలు 12.72 శాతం పెరిగి 2,85,367 యూనిట్లుగా నమోదైనట్లు ప్రకటించింది. గత ఏడాది నవంబర్లో ఈ సంఖ్య 2,53,139గా ఉన్నట్లు గుర్తుచేసింది.
సియామ్ వెల్లడించిన మరిన్ని విషయాలు..
- ద్విచక్ర వాహన విక్రయాలు గత నెల 13.43 శాతం పెరిగాయి. మొత్తం 16,00,379 యూనిట్లు అమ్ముడయ్యాయి. గత ఏడాది ఇదే నెలలో 14,10,939 యూనిట్లు విక్రయమయ్యాయి.
- మోటార్ సైకిళ్ల విక్రయాలు గత నెల 14.9 శాతం వృద్ధితో.. 10,26,705 యూనిట్లుగా నమోదయ్యాయి. 2019 నవంబర్లో 8,93,538 యూనిట్లు అమ్ముడయ్యాయి.
- గత నెల 5,02,561 స్కూటర్లు విక్రయమయ్యాయి. 2019 నవంబర్లో అమ్ముడైన 4,59,851 యూనిట్లతో పోలిస్తే.. ఇవి 9.29 శాతం అధికం.
- త్రిచక్ర వాహన విక్రయాల మాత్రం నవంబర్లో భారీగా 57.64 శాతం పతనమయ్యాయి. 2019 నవంబర్లో 55,778 యూనిట్లు విక్రయమవగా.. ఈ ఏడాది అదే సమయానికి 23,626 యూనిట్లు మాత్రమే అమ్ముడయ్యాయి.
ఇదీ చూడండి:'రూ.1.45 లక్షల కోట్ల పన్ను రీఫండ్'
