కనీస పింఛను మొత్తాన్ని వెంటనే రూ.3 వేలకు పెంచాలని బోర్డులోని కార్మిక సంఘాలు కోరుతుండగా, అంత భారం భరించలేమని ఈపీఎఫ్‌ఓ చెబుతోంది. ఈ నేపథ్యంలో విశ్రాంత కార్మికులు, వితంతు పింఛనుదారులకు కనీసం రూ.2 వేలకు పెంచాలని ఉన్నతస్థాయి కమిటీ తెలిపింది. అవసరమైతే కేంద్రం నుంచి ఆర్థిక సహకారం తీసుకోవాలని సూచించింది.
గత రెండు ఈపీఎఫ్‌ సెంట్రల్‌ బోర్డు ట్రస్టీల సమావేశాల్లో కనీస పింఛను పెంపు అంశం చర్చకు వచ్చినప్పుడు.. ఆర్థిక శాఖతో చర్చించి నిర్ణయం తీసుకుంటామని ఈపీఎఫ్‌ఓ బోర్డు ఛైర్మన్‌, కేంద్ర కార్మికశాఖ మంత్రి హామీ ఇచ్చారు. ఇప్పటికీ నిర్ణయం జరగలేదు. మార్చి 5న జరిగే సమావేశంలోనైనా దీనిపై నిర్ణయం తీసుకుంటారని దాదాపు 44 లక్షల మంది పింఛనుదారులు ఎదురుచూస్తున్నారు.
కేంద్రం బకాయిలు రూ.9,114 కోట్లు
ఉద్యోగుల పింఛను పథకం (ఈపీఎస్‌) కింద 1.16 శాతం వాటా కేంద్ర ప్రభుత్వం భరించాలి. ఈపీఎఫ్‌ఓ-95 చట్టం అమల్లోకి వచ్చినప్పటి నుంచి వాటా మేరకు కేంద్రం నిధులివ్వడంలేదు. ఈ బకాయిలు రూ.8,063 కోట్లకు చేరాయి. మరోవైపు కనీస పింఛను రూ.వెయ్యిగా నిర్ణయించినప్పుడు, ఆ మేరకు లోటు కింద చెల్లించాల్సిన నిధులు రూ.1,051 కోట్లుగా లెక్కతేలింది. ఈ మొత్తం కలిపి కేంద్రం నుంచి రావాల్సిన బకాయిలు రూ.9,114 కోట్లకు చేరాయి.
ఇదీ చూడండి: 'వాహనం' పరుగు తీసేదెప్పుడు?
