వచ్చే ఆర్థిక సంవత్సరానికి హెచ్-1బీ వీసా దరఖాస్తులను ఏప్రిల్ 1 నుంచి స్వీకరించనున్నట్లు అమెరికా పౌరసత్వం, వలసదారుల సేవవిభాగం(యూఎస్సీఐఎస్) ప్రకటించింది. ఇందుకోసం నూతన డేటాహబ్ను కూడా ప్రారంభించనున్నట్లు పేర్కొంది. దీని ద్వారా భారతీయ ఐటీ ఉద్యోగుల పని వీసా జారీలో మరింత పారదర్శకతను పెంచేందుకు ఈ హబ్ ఉపయోగపడుతుందని తెలిపింది.
అమెరికా ఐటీ కంపెనీల్లో ఉద్యోగం చేయాలంటే విదేశీయులు తప్పని సరిగా హెచ్-1బీ వీసా కలిగి ఉండాలి. ప్రత్యేక నైపుణ్యాలున్న వారికి హెచ్-1బీ వీసా రావటం కొంచెం సులువు. ప్రతి ఏటా భారత్, చైనా సహా ఇతర దేశాల నుంచి వేల సంఖ్యలో హెచ్-1బీ వీసాకు దరఖాస్తులు అందుతుంటాయి. అయితే ఈ వీసా కేవలం అమెరికాలో పని చేయడానికి మాత్రమే వర్తిస్తుంది.
ఈ సారి కొత్తగా తీసుకు వచ్చిన డేటా హబ్ ద్వారా దరఖాస్తుల ఆమోదం, తిరస్కరణల రేటును తెలుసుకునే వీలుందని యూఎస్సీఐఎస్ పేర్కొంది. వీటితో పాటు హెచ్-1బీ వీసాలకు ఎంతమంది దరఖాస్తు చేసుకున్నారనే వివరాల్ని కూడా తెలుసుకునేందుకు వీలు కలుగుతుందని పేర్కొంది.