'ప్రజాసమస్యలు గాలికొదిలి కేసీఆర్​ తీర్థయాత్రలు'

రాష్ట్ర ప్రభుత్వంపై భాజపా రాష్ట్ర అధ్యక్షుడు కె. లక్ష్మణ్​ ఆరోపణాస్త్రాలు సంధించారు. ప్రజా సమస్యలను గాలికొదిలేసి ముఖ్యమంత్రి విహారయాత్రలకు వెళ్లారని విమర్శించారు. మరోసారి మోదీ ప్రధాని పదవి చేపట్టడం ఖాయమని ఆశాభావం వ్యక్తం చేశారు.

రాష్ట్రంలో విద్యారంగం పూర్తిగా భ్రష్టుపట్టిపోయిందని భాజపా రాష్ట్ర అధ్యక్షుడు కె. లక్ష్మణ్​ విమర్శించారు. తెలంగాణ ఏర్పాటయ్యాక ఒక్క ఉపాధ్యాయ పోస్టు కూడా భర్తీ కాలేదన్నారు. ఇంటర్​ జవాబు పత్రాలను కార్పోరేట్​ ఉపాధ్యాయులతో మూల్యాంకనం చేయించారని ఆరోపించారు. ఇంటర్​ ఫలితాల వ్యవహారంలో గ్లోబరీనా సంస్థను ప్రభుత్వం వెనకేసుకురావడం సిగ్గుచేటన్నారు. ప్రజలు సమస్యలతో సతమతమవుతుంటే ముఖ్యమంత్రి తీర్థయాత్రలకు వెళ్లడం పూర్తిగా బాధ్యతారాహిత్యమని లక్ష్మణ్​ ధ్వజమెత్తారు.

మోదీ మరోసారి ప్రధాని కావడం ఖాయమని జోస్యం చెప్పారు. భాజపా అధికార పగ్గాలు చేపట్టాక.. ఉగ్రవాదం తగ్గుముఖం పట్టిందని, నిత్యావసర ధరలు దిగివచ్చాయని తెలిపారు. మే 23 తర్వాత రాష్ట్రంలో కాంగ్రెస్​, తెదేపాలు పూర్తిగా కనుమరుగవుతాయన్నారు.

ప్రాంతీయ పార్టీలు కుటుంబ పాలనను, కులాలను పెంచి పోషిస్తున్నాయని మండిపడ్డారు. గతంలో కంటే తమ ఓట్లు, సీట్లు పెరుగుతాయని విశ్వాసం వ్యక్తం చేశారు. వారణాసిలో మోదీకి వ్యతిరేకంగా నామినేషన్​ వేసినవారందరూ తెరాస ఏజెంట్లేనని ఆరోపించారు.

ఇవీ చూడండి: బాబు, కేసీఆర్​పై మోదీ 'యూటర్న్​ పంచ్'​