పాలమూరు ఉల్లి రైతులకు కాస్త ఉపశమనం

ఇన్నాళ్లు మహబూబ్​నగర్ జిల్లా ఉల్లి రైతులు కనీస మద్దతు ధర లభించక తీవ్ర నష్టాన్ని చవిచూశారు. బుధవారం దేవరకద్ర మార్కెట్​లో ఉల్లికి ఆశాజనకంగా ధర రావటం వల్ల రైతులకు కాస్త ఊరట లభించింది.

మహబూబ్​నగర్ జిల్లా దేవరకద్ర మార్కెట్​లో ఉల్లి రైతులకు కొద్దిగా ఊరట లభించింది. ఇన్నాళ్లు గిట్టుబాటు ధర లేక విలవిల్లాడిన అన్నదాతలకు కనీస మద్దతు ధరతో కాస్త ఉపశమనం దొరికింది. ఈరోజు మార్కెట్​ ఉల్లి విక్రయాలను బహిరంగ వేలం ద్వారా నిర్వహించారు. పంట నాణ్యతను బట్టి క్వింటాకు 400 నుంచి 900 రూపాయల వరకు కొనసాగినట్లు మార్కెట్​ వర్గాలు తెలిపాయి.

పోయిన వారం వరకు క్వింటా ఉల్లి 300 నుంచి 670 రూపాయలు మాత్రమే ధర పలకడం వల్ల గిట్టుబాటు ధర లభించక చాలా మంది రైతులు తీవ్ర నష్టాన్ని చవి చూశారు. కొంతమంది రైతులు తక్కువకు అమ్ముకోలేక పొలాల దగ్గర నిల్వ ఉంచారు. ఫిబ్రవరిలో చలిగాలులకు మొలకెత్తిన ఉల్లితో, మార్చి నెల ప్రారంభంలో ఎండలు పెరిగి ఆరబెట్టిన గడ్డ సన్నబడటం వల్ల రెండు విధాలుగా నష్టాలపాలయ్యారు. ఈనెల చివరి వారంలో ఉల్లిగడ్డకు డిమాండ్ పెరగడం వల్ల ఆశించిన ధరలు ఉల్లి రైతులు పొందగలుగుతున్నారు.

ఇవీ చూడండి:'విద్యావంతుల్లో ప్రభుత్వంపై వ్యతిరేకత ఉంది'