భారత్లో 2010 నుంచి 2019 మధ్య జనాభా వృద్ధి ఏటా సగటున 1.2 శాతంగా నమోదైనట్లు ఐక్యరాజ్య సమితి జనాభా కార్యకలాపాల నిధి (యూఎన్పీఏ) నివేదిక వెల్లడించింది.
భారత్ జనాభా 2019లో 136 కోట్లకు చేరినట్లు పేర్కొంది. భారత దేశ జనాభా 1969లో 54.5 కోట్లు, 1994లో 94.2 కోట్లుగా ఉంది.
చైనా కన్నా రెండింతల వృద్ధి
చైనా వార్షిక జనాభా వృద్ధితో పోల్చుకుంటే... భారత వృద్ధి రెండింతలు ఎక్కువగా ఉన్నట్లు "ఐరాస పునరుత్పత్తి ఆరోగ్య సంస్థ ప్రపంచ జనాభా 2019" గణాంకాల్లో వెల్లడైంది.
2010 నుంచి 2019 మధ్య కాలంలో చైనా జనాభా వృద్ధి రేటు 0.5 శాతంగా నమోదైనట్లు నివేదిక తెలిపింది. ప్రస్తుతం చైనా జనాభా 142 కోట్లకు చేరింది.
చైనా జనాభా 1969లో 80.6 కోట్లుగా, 1994లో 123 కోట్లుగా ఉంది.
తగ్గిన సంతానోత్పత్తి సామర్థ్యం
ఈ నివేదిక ప్రకారం భారతీయ మహిళల సంతానోత్పత్తి రేటు 1969లో 5.6గా ఉండగా... అది 1994లో 3.7కు, 2019లో 2.3కు పడిపోయినట్లు వెల్లడించింది.
పెరిగిన ఆయుర్ధాయం
భారత్లో గరిష్ఠ జీవనకాల ప్రమాణం 2019లో 69 ఏళ్లకు వృద్ధి చెందినట్లు నివేదిక పేర్కొంది. ఇది1969లో 47 ఏళ్లుగా, 1994లో 60 ఏళ్లుగా ఉంది.
ఏ వయస్సు వారు ఎంత మంది
దేశ జనాభాలో మొత్తం 0 నుంచి 14 ఏళ్లు, 10 నుంచి 24 ఏళ్ల వయసున్న వారు కలిపి 27 శాతం మంది ఉన్నారు. 15 నుంచి 65 ఏళ్ల మధ్య వయసున్న వారు 67 శాతం మంది ఉన్నారు. 65 ఏళ్లు పైబడిన వారు 6 శాతం మంది ఉన్నారు.
జనన, మరణాలు
ప్రసూతి మరణాల నిష్పత్తిలో తగ్గుదల... భారత్లో మెరుగైన ఆరోగ్య సంరక్షణ వృద్ధిని తెలియ జేస్తున్నట్లు నివేదిక తెలిపింది.
ఈ నివేదిక ప్రకారం 1994లో ప్రతి లక్ష జననాలకు 488 మరణాలు ఉంటే... 2015లో నాటికి అవి 174కు తగ్గాయి.
ఆందోళన కరంగా మహిళల ఆరోగ్య వృద్ధి
ప్రపంచ వ్యాప్తంగా మహిళల ఆరోగ్య గణాంకాలు ఆందోళనకరంగా ఉన్నాయని యూఎన్పీఏ జెనీవ డైరెక్టర్ మోనికా ఫెర్రో అన్నారు. 15 నుంచి 35 ఏళ్ల మధ్య వయసున్న మహిళల వివరాలు మొదటి సారి ప్రచురించినట్లు ఈ నివేదికలో పేర్కొన్నట్లు ఆమె చెప్పారు.
వీటిని సాధారణ స్థితికి తీసుకురావాలంటే... ప్రపంచవ్యాప్తంగా ఉన్న కోట్లాది మహిళలకు మెరుగైన ఆరోగ్య సేవలందిచాల్సిన అవసరం ఉందని ఆమె పేర్కొన్నారు.
జీవిత భాగస్వామితో లైంగిక కలయిక, గర్భనిరోధం, ఆరోగ్య సంరక్షణ వంటి విషయాలపై అవగాహన పెంచాల్సిన అవసరం ఉందన్నారు.
ఓ విశ్లేషణ ప్రకారం మహిళలకు పునరుత్పత్తి, లైంగిక పరమైన హక్కులు లేకపోవడం కారణంగా... వారు విద్య, ఆదాయ, రక్షణ వంటి విషయాల్లో వెనుకబడి... వారి సొంత భవిష్యత్తును నిర్ణయించుకోలేకపోతున్నారని పేర్కొన్నారు. ఇందుకు ప్రధాన కారణం బాల్య వివాహాలేనని నివేదికలో వెల్లడైంది.
తక్షణమే అవసరం
ప్రపంచ వ్యాప్తంగా 3కోట్ల50లక్షల మంది మహిళలు, అమ్మాయిలకు ప్రస్తుతం అత్యవసర ఆరోగ్యపరమైన సేవలందించాల్సి ఉందని నివేదిక హెచ్చరించింది.
ప్రతి రోజు 500లకు పైగా స్త్రీలు ప్రసవ సంబంధ కారణాలతో మరణిస్తున్నట్లు నివేదిక పేర్కొంది.