Gang rape victim: ఓ మహిళను ప్రేమ పేరుతో ట్రాప్ చేసి ఆరు నెలలుగా లవర్ సహా పలువురు అత్యాచారానికి పాల్పడిన సంఘటన బిహార్లోని పశ్చిమ చంపారన్ జిల్లాలో జరిగింది. ఈ కేసులో బాధితురాలి ప్రేమికుడిని అరెస్ట్ చేశారు పోలీసులు. మిగతా వారికోసం గాలిస్తున్నారు.
ఇదీ జరిగింది..
పోలీసుల కథనం ప్రకారం.. ఆరు నెలల క్రితం బాధితురాలిని లవ్ ట్రాప్లోకి దింపాడు నిందితుడు. ఇద్దరు శారీరకంగా కలిసిన తర్వాత వదిలేశాడు. బాధితురాలు గర్భం దాల్చగా పెళ్లికి నిరాకరించి.. అబార్షన్ చేయించాడు. దీంతో ఆమె కుటుంబం సైతం ఇంట్లోంచి వెళ్లగొట్టింది. అప్పటి నుంచి స్థానిక పాఠశాలలో తలదాచుకుంటోంది. పాఠశాలలో ఒంటరిగా ఉంటున్న బాధితురాలిపై కొందరు దుండగులు కన్నేశారు. మార్చి 5న ఆమెపై ఇద్దరు వ్యక్తులు గ్యాంగ్ రేప్కు పాల్పడ్డారు. ఆ తర్వాత మార్చి 11న గ్రామానికి చెందిన మరో వ్యక్తి అత్యాచారం చేశాడు. ఈ విషయం ఎవరికీ చెప్పొద్దని బెదిరించారు.
తనపై జరిగిన అఘాయిత్యాలపై స్థానిక మహిళా పోలీస్ స్టేషన్లో ఫిర్యాదు చేసింది బాధితురాలు. కేసు నమోదు చేసుకుని ఆమె ప్రేమికుడిని అరెస్ట్ చేశారు. 'బాధితురాలిని వైద్య పరీక్షలకు పంపించాం. పరారీలో ఉన్నవారి కోసం గాలింపు చేపట్టాం. అరెస్టయిన నిందితుడు పలుమార్లు మహిళను కలిశాడు. ఈ క్రమంలోనే ఆమె తల్లిదండ్రులను చంపేస్తానని బెదిరించాడు' అని బగగా ఎస్డీపీఓ కైలాశ్ ప్రసాద్ తెలిపారు.
మసాజ్ పేరుతో విదేశీయురాలిపై రేప్
ఆయుర్వేద మసాజ్ పేరుతో ఓ విదేశీయురాలిపై అత్యాచారానికి పాల్పడిన సంఘటన రాజస్థాన్ రాజధాని జైపుర్లో జరిగింది. సింధీ క్యాంప్ పోలీస్ స్టేషన్ పరిధిలోని ఓ హోటల్లో ఈ అఘాయిత్యం జరిగింది. నెదర్లాండ్స్కు చెందిన బాధితురాలు(30) ఫిర్యాదు మేరకు కేసు నమోదు చేసుకుని నిందితుడిని అరెస్ట్ చేశారు పోలీసులు.
"కొన్ని రోజుల క్రితం జైపుర్ను చూసేందుకు బాధితురాలు నెదర్లాండ్స్ నుంచి వచ్చింది. స్థానిక హోటల్లో ఉంటోంది. ఈ క్రమంలోనే మార్చి 16న ఆయుర్వేద మసాజ్ అంటూ ఓ వ్యక్తి ఆమె గదికి వెళ్లాడు. అర్ధగంట పాటు మసాజ్ చేసిన తర్వాత ఆమెతో అసభ్యంగా ప్రవర్తించటం ప్రారంభించాడు. ఆ తర్వాత అత్యాచారానికి పాల్పడ్డాడు. చివరికి ఆమెకు క్షమాపణలు చెప్పి ఎవరికీ చెప్పొద్దని వేడుకున్నాడు. ఓ గంట తర్వాత హోటల్ నుంచి వెళ్లిపోయాడు. రోజంతా మనోవేదనకు గురైన బాధితురాలు గురువారం రాత్రి హోటల్ మేనేజర్కు జరిగిన విషయాన్ని చెప్పింది. ఆ తర్వాత పోలీసులకు సమాచారం అందించారు. వెంటనే రంగంలోకి దిగిన పోలీసులు నిందితుడు కేరళకు చెందిన మురళీధర్ అలియాస్ బిజును కస్టడీలోకి తీసుకున్నారు. బాధితురాలికి వైద్య పరీక్షలు నిర్వహించారు."
- గుంజన్ సోనీ, సింధి క్యాంప్ పోలీస్ స్టేషన్ అధికారి.
ఈ సంఘటన జరిగిన తర్వాత నిందితుడు నగరాన్ని వదిలి కేరళకు పారిపోయేందుకు సిద్ధమైనట్లు పోలీసు అధికారి తెలిపారు. ఖాతీపురా ప్రాంతంలో ఉన్నట్లు గుర్తించి అరెస్ట్ చేశామన్నారు. ఖాతీపురాలో మసాజ్ సెంటర్ నడిపిస్తున్నాడని, ప్రముఖ హోటళ్లతో కాంట్రాక్టులు కుదుర్చుకుని మసాజ్ సేవలు అందిస్తున్నట్లు గుర్తించామన్నారు.
ఇదీ చూడండి: చెరువు మధ్యలో దాక్కున్న 'రౌడీ'.. డ్రోన్ సాయంతో పట్టేసిన పోలీసులు
