రాజ్యసభ సభ్యుడిగా కాంగ్రెస్ సీనియర్ నేత గులాం నబీ ఆజాద్ ఈనెల 15న పదవీ విరమణ పొందనున్న నేపథ్యంలో ఆయన స్థానాన్ని కాంగ్రెస్ ఎవరికి అప్పగిస్తుందనే విషయం ఆసక్తికరంగా మారింది. ఆజాద్ రాజ్యసభలో ప్రధాన ప్రతిపక్షనేతగా బాధ్యతలు చేపట్టారు. ఇప్పుడు ఆ స్థానాన్ని భర్తీ చేసేందుకు కాంగ్రెస్ పలువురు సీనియర్ నేతల పేర్లను పరిశీలిస్తోందని సమాచారం. ఈ జాబితాలో మల్లికార్జున ఖర్గే, ఆనంద్ శర్మ, దిగ్విజయ్ సింగ్, చిదంబరం, కపిల్ సిబల్ వంటి కీలక నేతలు ఉన్నారు.
లెక్కప్రకారం..
సీనియారిటీ ప్రకారం ఆ పదవి ఆజాద్ తర్వాతి స్థానంలో ఉన్న ఆనంద్ శర్మకు దక్కాలి. ప్రస్తుతం రాజ్యసభలో ఉప ప్రధాన ప్రతిపక్షనేతగా ఆయన కొనసాగుతున్నారు. పార్టీ కార్యకలాపాల్లో చురుగ్గా ఉన్నారు. అయితే శర్మకు పదవి దక్కడంపై సందేహాలు వ్యక్తం అవుతున్నాయి. పార్టీలో సంస్కరణలు అవసరమంటూ ఇటీవల కాంగ్రెస్ అధిష్ఠానానికి లేఖ రాసిన 23 మందిలో ఆయన ఒకరు. ఈ ప్రభావం ఆయన నియామకంపైన ఉండొచ్చని పార్టీ వర్గాలు అభిప్రాయపడుతున్నాయి.
ఆనంద్ శర్మకు ప్రత్యామ్నాయంగా మధ్యప్రదేశ్ మాజీ సీఎం, సీనియర్ నేత దిగ్విజయ్ సింగ్ను నియమించే అవకాశం ఉంది. ప్రాంతీయ సమానత్వాన్ని దృష్టిలో పెట్టుకుని కాంగ్రెస్ ఈ నిర్ణయం తీసుకునే వీలుంది. లోక్సభలో ప్రతిపక్ష నేత అధిర్ రంజన్ చౌదరి, గౌరవ్ గొగొయ్ ఇద్దరూ హిందీ రాష్ట్రాలకు చెందని వారే. సీనియారిటీ విషయానికొస్తే చిదంబరం కూడా వీరితో సమానంగా అర్హులే.
ఖర్గేకు పగ్గాలు..?
కాంగ్రెస్కు నమ్మిన బంటుగా ఉంటున్న సీనియర్ నేత మల్లికార్జున ఖర్గేకు రాజ్యసభలో ప్రధాన ప్రతిపక్షనేతగా బాధ్యతలు అప్పజెప్పే అవకాశాలు ఎక్కువగా ఉన్నాయి. రాహుల్ గాంధీతో సాన్నిహిత్యం, దళిత నేత కావడం మొదలైన అంశాలు ఖర్గే వైపు ముగ్గు చూపేలా చేస్తాయని.. ఆయనకు పదవిని అప్పగిస్తే పార్టీకి ఉపయోగమేనని కాంగ్రెస్ వర్గాలు భావిస్తున్నాయి. ఆజాద్ పదవీ విరమణను దృష్టిలో పెట్టుకునే కాంగ్రెస్ ఖర్గేను రాజ్యసభలో కూర్చోబెట్టిందని సమాచారం.
ఆజాద్ రీఎంట్రీ!
ఈ ఏడాది ఏప్రిల్ నాటికి కేరళకు చెందిన మూడు రాజ్యసభ స్థానాలు ఖాళీ అవనున్నాయి. వీటిలో ఒకటి కాంగ్రెస్కు దక్కుతుంది. ఈ పదవిని భర్తీ చేసేందుకు ఆజాద్ మళ్లీ ఎన్నికల్లో పాల్గొని ఎగువ సభకు రావచ్చు. కానీ ఆజాద్ రాజ్యసభలో రీఎంట్రీ ఇచ్చే అవకాశాలు తక్కువ.
ఇదీ చదవండి : రాజకీయ భవితవ్యంపై ఆజాద్ కీలక వ్యాఖ్యలు
