కిడ్నాపర్లను పట్టుకునేందుకు పక్కా ప్రణాళికతో మాటు వేసి ఉండటం.. తప్పించుకోవడానికి ప్రయత్నిస్తే వారిని ఛేజ్ చేసి మరీ పట్టుకోవడం సినిమాల్లో తరచూ చూస్తుంటాం. తమిళనాడులోని చెన్నైలో ఇలాంటి ఘటనే జరిగింది. ఓ కానిస్టేబుల్.. తప్పించుకు పారిపోతున్న కిడ్నాపర్లను పట్టుకునేందుకు ప్రాణాలకు తెగించాడు. ఇందుకు సంబంధించిన సీసీటీవీ దృశ్యాలు సోషల్ మీడియాలో వైరల్ అయ్యాయి.
ఇదీ జరిగింది..
చెట్పట్లోని హ్యారింగ్టన్ రోడ్డులో నివసించే మూసా అనే ఓ రిటైర్డ్ ఎస్ఐను ఈనెల 5న దుండగులు అపహరించారు. అతడి కుమారుడైన బషీర్కు కాల్ చేసి.. మంగళవారం రాత్రి ఎగ్మోర్ స్టేషన్కు వచ్చి రూ.25 లక్షలు ఇవ్వాలని డిమాండ్ చేశారు. అప్పటికే బషీర్ పోలీసులకు ఫిర్యాదు చేయడం వల్ల కిడ్నాపర్లు చెప్పిన ప్రాంతానికి పోలీసులు కూడా మఫ్టీలో వచ్చారు.
బషీర్ నుంచి డబ్బు తీసుకున్న కిడ్నాపర్లు.. మూసాను విడిచిపెట్టారు. వెంటనే అప్రమత్తమైన అధికారులు కిడ్నాపర్లను చుట్టుముట్టారు. కారులో పరరయ్యేందుకు ప్రయత్నించిన నిందితులను పట్టుకునేందుకు కానిస్టేబుల్ శరవణకుమార్ ఆ కారుపైకి దూకాడు. మూడు కిలోమీటర్ల వరకు ఆ కారు బానెట్పైనే వేళ్లాడాడు. చివరికి.. అదుపు తప్పడం వల్ల కిడ్నాపర్ల కార్లు ఓ గోడకు ఢీకొంది. ఈ క్రమంలో శరవణకుమార్కు స్వల్ప గాయాలయ్యాయి.
శరవణకుమార్ సాహసంతో పట్టుబడిన కిడ్నాపర్లను పోలీసులు అరెస్ట్ చేశారు.
ఈ కేసులో ట్విస్ట్ ఏంటంటే కిడ్నాప్కు గురైన 80 ఏళ్ల మూసా అక్రమ సరకును రవాణా చేస్తుండేవాడు. అతని వద్దే కిడ్నాపర్లలో ప్రధాన నిందితుడైన అరుప్ కుమార్ పనిచేసేవాడు. మూసా తనకు ఇవ్వాల్సిన డబ్బు బాకీ ఉండటం వల్లే అతను ఈ కిడ్నాప్కు ప్రయత్నించాడు.
ఇదీ చూడండి : పాఠశాలలో ఉగ్రవాదుల కాల్పులు- ఇద్దరు ఉపాధ్యాయులు మృతి
