ఉత్తర్ప్రదేశ్ ఝాన్సీలో కేరళకు చెందిన క్రైస్తవ సన్యాసినుల(నన్ల)ను భజరంగ్ దళ్ కార్యకర్తలు వేధించారన్న ఆరోపణలు దుమారానికి దారి తీశాయి. ఈ ఘటనపై చర్యలు తీసుకోవాలని కేరళ క్యాథలిక్ బిషప్స్ కౌన్సిల్ డిమాండ్ చేసింది. ఈ విషయాన్ని ప్రధాన మంత్రి నరేంద్ర మోదీ దృష్టికి భాజపా, కాంగ్రెస్ తీసుకువెళ్లాయి.
ఏం జరిగింది?
ఉత్తర్ప్రదేశ్ ఝాన్సీలో వేరే మతం నుంచి క్రైస్తవ మతంలోకి చేరాలనుకునే ఇద్దరు మహిళలు.. ఇద్దరు క్రైస్తవ సన్యాసినులతో కలిసి తమ స్వస్థలానికి వెళ్తున్నారు. అయితే.. బలవంతపు మత మార్పిళ్లకు పాల్పడుతున్నారని ఆరోపిస్తూ భజరంగ్ దళ్ కార్యకర్తలు పోలీసులకు ఫిర్యాదు చేశారు. దీంతో ఆ నలుగురిని పోలీసులు అదుపులోకి తీసుకున్నారు. అయితే... సరైన ఆధారాలు లేనందున వారిని విడిచిపెట్టగా, మరో రైలులో వెళ్లిపోయారని సంబంధిత అధికారులు తెలిపారు.
ఖండించిన విజయన్..
కేరళ ముఖ్యమంత్రి పినరయి విజయన్.. ఈ ఘటనను తీవ్రంగా ఖండించారు. రాజ్యాంగ ప్రసాదించిన వ్యక్తిగత స్వేచ్ఛ హక్కును కాలరాసిన వారిపై చర్యలు తీసుకోవాలని డిమాండ్ చేశారు. ఈ మేరకు కేంద్ర హోం మంత్రి అమిత్ షాకు ఆయన లేఖ రాశారు.
" నలుగురు మహిళలను భజరంగ్ దళ్ కార్యకర్తలు అడ్డగించి, వారిపై బెదిరింపులకు పాల్పడ్డారు. బలవంతంగా మతమార్పిడి చేస్తున్నారని ఆరోపిస్తూ భజరంగ్ దళ్ కార్యకర్తలు ఫిర్యాదు చేయగా.. నలుగురు మహిళలను పోలీసులు బలవంతంగా రైలు నుంచి కిందకు దింపారు. ఇలాంటి ఘటనలు దేశ ప్రతిష్ఠను దెబ్బతీస్తాయి. కేంద్రం దీనిని తీవ్రంగా ఖండించాల్సిన అవసరం ఉంది."
-పినరయి విజయన్, కేరళ ముఖ్యమంత్రి
అంతకుముందు మీడియా సమావేశంలో ఉత్తర్ప్రదేశ్లోని భాజపా ప్రభుత్వంపై విజయన్ తీవ్రస్థాయిలో విమర్శలు చేశారు విజయన్. మతం పేరుతో హింసకు పాల్పడే ఘటనలు ఉత్తర్ప్రదేశ్లో ఎక్కువగా జరుగుతున్నాయని విమర్శించారు.
'ఆర్ఎస్ఎస్ వ్యూహమే'
ఈ వేధింపుల ఘటనపై కాంగ్రెస్ అగ్ర నేత రాహుల్ గాంధీ.. ట్విట్టర్ వేదికగా ఆగ్రహం వ్యక్తం చేశారు. మైనార్టీలను అణచివేసేందుకు ఆర్ఎస్ఎస్ జరుపుతున్న విద్వేష ప్రచారంలో భాగంగానే ఈ ఘటన జరిగిందని ఆరోపించారు.
"మైనార్టీలను అణచివేయాలని ఆర్ఎస్ఎస్ అమలు చేస్తున్న విద్వేష ప్రచారంలో భాగంగానే ఈ ఘటన జరిగింది. అటువంటి విభజన శక్తులను ఓడించడానికి, ఆత్మపరిశీలన చేసుకుని, దిద్దుబాటు చర్యలు తీసుకోవలసిన సమయం ఆసన్నమైంది.
-రాహుల్ గాంధీ.
'తప్పకుండా చర్యలు తీసుకుంటాం'
ఈ ఘటనపై కేంద్ర హోం మంత్రి అమిత్ షా స్పందిచారు. బాధ్యులపై కఠిన చర్యలు తీసుకుంటామని కేరళలోని కంజిరప్పల్లిలో ఎన్నికల ప్రచారంలో హామీ ఇచ్చారు.
"కేరళ ప్రజలకు నేను హామీ ఇస్తున్నాను. ఈ ఘటనకు కారణమైన దోషులపై తగిన చర్యలు తీసుకుంటాం."
- కేంద్ర హోం మంత్రి అమిత్ షా
