Vaccination Children: దేశవ్యాప్తంగా సోమవారం 15-18 ఏళ్ల వయస్సు వారికి టీకాల పంపిణీ కార్యక్రమం ప్రారంభించనుంది కేంద్రం. ఈ నేపథ్యంలో.. చిన్నారుల వ్యాక్సినేషన్ ఏర్పాట్లపై కేంద్ర ప్రభుత్వం సమీక్షించింది. అన్ని రాష్ట్రాలు, కేంద్ర పాలిత ప్రాంతాల ఆరోగ్య మంత్రులు, ప్రభుత్వ ప్రధాన కార్యదర్శులతో వర్చువల్గా మాట్లాడారు కేంద్ర ఆరోగ్య మంత్రి మన్సుఖ్ మాండవీయ. 15-18 ఏళ్ల వయస్సు వారికోసం ప్రత్యేక వ్యాక్సినేషన్ కేంద్రాలను ఏర్పాటు చేయాలని సూచించారు.
టీకాలు మిక్సింగ్ కాకుండా అన్ని జాగ్రత్తలు తీసుకోవాలని స్పష్టం చేశారు. ఒమిక్రాన్ వేరియంట్ విస్తరిస్తున్న నేపథ్యంలో.. తీసుకోవాల్సిన చర్యలపై మాట్లాడారు.
ప్రస్తుతం 15-18 ఏళ్ల వయస్సు వారికి కొవాగ్జిన్ టీకా మాత్రమే అందుబాటులో ఉంది. కేంద్ర ఆరోగ్య శాఖ నూతన మార్గదర్శకాల్లో ఇది స్పష్టంగా ఉంది. మరోవైపు.. దేశంలో వయోజనులకు కొవాగ్జిన్తో పాటు కొవిషీల్డ్, స్పుత్నిక్ వీ టీకాలను అందిస్తున్నారు. ఈ నేపథ్యంలోనే వ్యాక్సిన్ పంపిణీ విషయంలో గందరగోళం తలెత్తకుండా చూసుకోవాలని పేర్కొన్నారు మాండవీయ.
''టీకాల పంపిణీ సమయంలో వేర్వేరు వ్యాక్సిన్లు కలవకుండా ఉండేందుకు.. ప్రత్యేక కొవిడ్ వ్యాక్సినేషన్ కేంద్రాలు(సీవీసీ), ప్రత్యేక సెషన్ సైట్లు, ప్రత్యేక క్యూలైన్లు(ఒకవేళ అదే కేంద్రంలో వయోజనులకు వ్యాక్సినేషన్ నిర్వహిస్తే) ఏర్పాటు చేయాలి. వ్యాక్సినేషన్ బృందాలను కూడా వేర్వేరుగా నియమించాలి.''
- మన్సుఖ్ మాండవీయ, కేంద్ర ఆరోగ్య శాఖ మంత్రి
అన్ని రాష్ట్రాలు తమ వద్ద అందుబాటులో ఉన్న టీకాల సమాచారాన్ని ఎప్పటికప్పుడు కో-విన్ యాప్లో అప్డేట్ చేస్తుండటం ద్వారా.. వ్యాక్సిన్ పంపిణీ సులభతరం అవుతుందని కేంద్ర ఆరోగ్య శాఖ ఓ ప్రకటనలో తెలిపింది.
ఒమిక్రాన్ కట్టడిపై దిశానిర్దేశం
దేశంలో కరోనా ఒమిక్రాన్ కేసులు వేగంగా పెరిగిపోతున్నాయి. ఈ తరుణంలో వైరస్ కట్టడికి అవగాహన కల్పించేలా వెబినార్లు నిర్వహించాలని కేంద్రం నిర్ణయించింది. దిల్లీ ఎయిమ్స్ సహకారంతో కొవిడ్ కేసుల క్లినికల్ మేనేజ్మెంట్ అంశాలపై జనవరి 5 నుంచి 19 మధ్య వెబినార్లను నిర్వహించేందుకు సిద్ధమైంది.
ఈ మేరకు కేంద్ర ఆరోగ్య కార్యదర్శి రాజేశ్ భూషణ్.. అన్ని రాష్ట్రాలు, కేంద్రపాలిత ప్రాంతాలకు లేఖ రాశారు. అన్ని ప్రభుత్వ, ప్రైవేటు కొవిడ్-19 ఆరోగ్య కేంద్రాల వైద్యులు, కొవిడ్-19 చికిత్స కేంద్రాల ఇన్ఛార్జిలు, సీడీఎంఓలు వెబినార్లకు హాజరుకావాలని ఆయన అభ్యర్థించారు.
India's Covid vaccination programme:
భారత్లో కొవిడ్ వ్యాక్సినేషన్.. ప్రపంచంలోనే అత్యంత విజయవంతమైన, పెద్దదైన టీకా పంపిణీ కార్యక్రమాల్లో ఒకటని కేంద్ర ఆరోగ్య శాఖ ఓ ప్రకటనలో తెలిపింది. కొవిడ్-19 టీకా పంపిణీలో భారత్ లక్ష్యాలను అందుకోలేదని కొన్ని మీడియాలు తప్పుడు వార్తలు ఇస్తూ తప్పుదోవ పట్టిస్తున్నాయని, వాటిని నమ్మొద్దని పేర్కొంది.
గతేడాది జనవరి 16న వ్యాక్సినేషన్ ప్రారంభమైనప్పటి నుంచి భారత్ ఎన్నో మైలురాళ్లను అధిగమించినట్లు ఆరోగ్య శాఖ స్పష్టం చేసింది.
- అన్ని దేశాలకంటే ముందే.. 9 నెలల వ్యవధిలోనే భారత్లో 100 కోట్ల టీకా డోసుల పంపిణీ జరిగిందని ఉద్ఘాటించింది.
- ఒక్కరోజు అత్యధికంగా 2.51 కోట్ల డోసులు అందించామని, చాలా సార్లు రోజుకు కోటికిపైగా వ్యాక్సిన్ పంపిణీ చేసినట్లు పేర్కొంది.
టీకా మొదటి డోసు పంపిణీలో అర్హులైన వారిలో 90 శాతం మందికి భారత్లో వ్యాక్సిన్ ఇచ్చినట్లు తెలిపిన కేంద్రం.. ప్రపంచంలో అన్ని దేశాల కంటే ముందంజలో ఉందని వివరించింది. ఈ జాబితాలో అమెరికా 73.2 శాతం, బ్రిటన్ 75 శాతం, ఫ్రాన్స్ 78 శాతం, స్పెయిన్ 84 శాతంతోనే ఉన్నాయని గుర్తుచేసింది.
భారత్లో 65 శాతం మందికిపైగా టీకా రెండు డోసులు తీసుకున్నట్లు వెల్లడించింది.
Covid Cases in India: దేశంలో కరోనా కేసులు ఆదివారం భారీగా నమోదయ్యాయి. ఒక్కరోజే 27,553 కేసులు వెలుగుచూశాయి. మరో 284 మంది ప్రాణాలు కోల్పోయారు. 9,249 మంది కోలుకున్నారు. మరోవైపు ఒమిక్రాన్ కేసుల సంఖ్య 2 వేలకు చేరువ కావడం మరింత ఆందోళన కలిగిస్తోంది.
ఇవీ చూడండి: దిల్లీ, మహారాష్ట్రలో కరోనా విలయం- రాష్ట్రాలకు కేంద్రం లేఖ
