ఉత్తరాఖండ్​కు కొత్త సీఎం- మూడు నెలలకే మార్పెందుకు?

కొద్ది నెలల్లో అసెంబ్లీ ఎన్నికలు జరగనున్న ఉత్తరాఖండ్​లో​ రాజకీయాలు మారోమారు రసవత్తరంగా మారాయి. ముఖ్యమంత్రి మార్పుపై ఊహాగానాలు మొదలయ్యాయి. ఇటీవల సీఎం తీరథ్​​ సింగ్​ రావత్​.. అత్యవసరంగా దిల్లీకి వెళ్లటం అందుకు ఆజ్యం పోసినట్లయింది. అధికారం చేపట్టిన మూడు నెలలకే ముఖ్యమంత్రి మార్పు అంశం తెరపైకి ఎందుకు వచ్చింది? రాష్ట్రంలో మరోమారు సీఎం మార్పు తప్పదా? అసలు కారణాలేంటి?

అసెంబ్లీ ఎన్నికల వేళ.. ఉత్తరాఖండ్ ముఖ్యమంత్రి పీఠం విషయంలో అధికార భాజపాకు మరోమారు చిక్కులు మొదలయ్యాయి. త్రివేంద్ర సింగ్​ రావత్​పై సొంత పార్టీ ఎమ్మెల్యేల్లో అసంతృప్తి వ్యక్తమైన క్రమంలో.. తీరథ్​ సింగ్​ రావత్​ను సీఎం పీఠంపై కూర్చోబెట్టింది అధిష్ఠానం. అయితే.. తీరథ్​కు రాష్ట్ర పగ్గాలు అప్పగించిన మూడు నెలల్లోనే మరోమారు సీఎం మార్పుపై వార్తలు రావటం గమనార్హం. భాజపా హైకమాండ్​ తీరథ్​ను అత్యవసరంగా దిల్లీ పిలిపించటంతో ఆ ఊహాగానాలకు ఆజ్యం పోసినట్లయింది. కొన్ని నెలల్లో అసెంబ్లీ ఎన్నికలు జరగనున్న నేపథ్యంలో ఇప్పుడు ముఖ్యమంత్రిని మార్చాల్సిన అవసరం ఏమొచ్చిందనేది ఇప్పుడు చర్చనీయాంశమైంది.

ముఖ్యమంత్రి తీరథ్​​ సింగ్​ రావత్​.. కేంద్ర హోంమంత్రి అమిత్​ షాతో దిల్లీలోని ఆయన నివాసంలో గురువారం సమావేశమయ్యారు. భాజపా జాతీయ అధ్యక్షుడు జేపీ నడ్డా సహా పార్టీ సీనియర్​ నేతలు హాజరైన ఈ భేటీ అర్ధరాత్రి వరకు సుదీర్ఘంగా కొనసాగింది. ఇద్దరు ఎమ్మెల్యేలు మృతి చెందటం వల్ల ఖాళీ ఏర్పడిన హల్ద్వానీ, గంగోత్రి సీట్లపై చర్చించినట్లు సమాచారం. అలాగే భవిష్యత్​లో జరగనున్న అసెంబ్లీ ఎన్నికల్లో అనుసరించాల్సిన వ్యూహాలను కూడా చర్చించినట్లు తెలుస్తోంది.

ఎమ్మెల్యేగా గెలిస్తేనే..

త్రివేంద్ర సింగ్​ రావత్​ను సీఎంగా తొలగించిన అనంతరం లోక్​ సభ సభ్యుడైన తీరథ్​ సింగ్​ రావత్​ను ముఖ్యమంత్రిగా నియమించారు. ఈ ఏడాది మార్చిలో సీఎంగా బాధ్యతలు చేపట్టారు. అయితే.. తీరథ్​ ముఖ్యమంత్రిగా కొనసాగాలంటే ఆరు నెలల్లోపు రాష్ట్ర అసెంబ్లీకి ఎన్నికవ్వాల్సి ఉంటుంది. సెప్టెంబర్​ 9లోపు అది పూర్తికావాలి. కానీ, కరోనా మహమ్మారి కారణంగా ఉప ఎన్నికలు నిర్వహించలేమని మే 5నే తేల్చి చెప్పింది కేంద్ర ఎన్నికల సంఘం. మరోవైపు.. ఏడాది లేదా ఆలోపే ఏ రాష్ట్రంలోనైనా సాధారణ ఎన్నికలే జరగాలని తెలిపింది. ఈ కారణంతో రాష్ట్రంలో ఇప్పట్లో ఉప ఎన్నికలు జరిగే పరిస్థితి లేదు. ఈ పరిస్థితుల్లో భాజపా అధిష్ఠానం వద్ద ఉన్న ఒకే ఒక అవకాశం ముఖ్యమంత్రిని మార్చటం.

తీరథ్​​ సింగ్​ రావత్​ సాల్ట్​ అసెంబ్లీ సీటు నుంచి పోటీ చేసి ఉంటే.. ప్రస్తుతం ఈ పరిస్థితి ఉండేది కాదని రాజకీయ విశ్లేషకులు భావిస్తున్నారు.

కొత్త సీఎం ఎవరు?

ప్రస్తుతం జరుగుతున్న పరిణామాలను పరిశీలిస్తే.. ముఖ్యమంత్రిని మార్చాలనే దృఢ నిశ్చయంతో భాజపా అధిష్ఠానం ఉన్నట్లు కనిపిస్తోంది. ఒకవేళ.. ఇప్పట్లో మార్పు చేకపోతే.. తన పదవీ కాలం 6 నెలలు ముగియగానే(సెప్టెంబర్​ 9) తీరథ్​ సింగ్​ రాజీనామా చేయాలి. ఆ తర్వాత ఎన్నికలకు మూడు నెలలు మాత్రమే సమయం ఉంటుంది.

ఏదేమైనా.. తీరథ్​ సింగ్​ రావత్​ రాజీనామా చేస్తే ఆ తర్వాత ఎవరు ఆ పదవి చేపడతారు? అనే ప్రశ్న తలెత్తుతోంది. ఈ విషయంలో ఇప్పటికీ ఎలాంటి స్పష్టత లేదు. కానీ, రాష్ట్రంలో భారీ మార్పు జరిగే అవకాశం ఉందని స్పష్టంగా తెలుస్తోంది.

ఇదీ చూడండి: మొన్న జీన్స్‌.. ఇవాళ అమెరికా.. మళ్లీ వార్తల్లోకి సీఎం