కేరళలో ఓ ఏనుగు దృష్టిని పరీక్షించేందుకు అల్ట్రాసౌండ్ సోనోగ్రామ్(యూఎస్జీ) స్కానింగ్ చేశారు అధికారులు. ఇటీవల దాని కళ్లు తెల్లబడటం వల్ల.. చూపు కోల్పోయి అనేక సమస్యలను ఎదుర్కుంటుందనే అనుమానంతో ఈ విధమైన పరీక్షలు నిర్వహించారు.
ఎందుకు స్కానింగ్?
కొల్లాం జిల్లా మావెలిక్కరకు చెందిన చిన్నూ.. 45ఏళ్ల ఏనుగును పోషిస్తున్నాడు. దాన్ని ముద్దుగా కన్నన్ అని పిలుచుకుంటాడతడు. ఇటీవల కన్నన్ కళ్లు తెల్లగా మారడం వల్ల.. అది కంటిచూపు సమస్యలను ఎదుర్కొంటోందని గ్రహించాడు. ఈ నేపథ్యంలో జిల్లాలోని డాక్టర్ అరవిందన్ అనే పశు వైద్యుణ్ని సంప్రదించాడు. కన్నన్కు అల్ట్రాసౌండ్ స్కానింగ్ చేయాలని ఆ వైద్యుడు సలహా ఇచ్చారు.
ఇదీ చదవండి: బోరుబావిలో గున్న ఏనుగు- స్థానికుల సహాయంతో బయటకు
ఎలా చేశారు?
కన్నన్ను బయట నిల్చోబెట్టి, గదిలోని యంత్రాలతో యూఎస్జీ స్కానింగ్ తీశారు. ఈ సమయంలో దాన్ని స్కానింగ్కు అనుకూలమైన ప్రదేశంలో నిల్చోబెట్టేందుకు వైద్యుడు, యజమాని తీవ్రంగా శ్రమించారు. ఆ తర్వాత దాన్ని నేలపై పడుకోబెట్టి ఇంజక్షన్ ఇచ్చేందుకూ ఆపసోపాలు పడ్డారు. గజరాజులకు ఇలాంటి పరీక్షలు చేయడం చాలా అరుదని ఆ వైద్యుడు చెప్పారు.
"ఏనుగులకు స్కానింగ్ చేయడం చాలా అరుదు. పైగా ఎన్నో సవాళ్లతో కూడుకున్న పని. వీటి స్కానింగ్ చిత్రాలు కూడా మానవులతో పోలిస్తే భిన్నంగా ఉంటాయి. అయినప్పటికీ దాన్ని విజయవంతంగా నిర్వహించాం."
- డాక్టర్ అరవిందన్, పశువైద్యులు
ఏం తేలింది?
కన్నన్కు స్కానింగ్ నిర్వహించాక వచ్చిన ఫలితాల్లో.. దాని కుడి కంట్లో శుక్లం, ఎడమ నేత్రంలో 'కార్నియల్ ఒపాసిటీ' ఉన్నట్టు తేలింది. ఈ కార్నియా.. చూపును ప్రభావితం చేస్తుందని అరవిందన్ తెలిపారు. అయితే.. చిన్నపాటి రాపిడి ద్వారా ఇంజక్షన్లను ఉపయోగించి దీనికి చికిత్స చేయవచ్చన్నారు. ఒక నెల తర్వాత కుడి కంట్లో ఏర్పడిన శుక్లాన్ని తొలగించేందుకు శస్త్రచికిత్స చేయాలని చెప్పారు.
"గజరాజులకు చేసే కంటిశుక్లం తొలగింపు శస్త్రచికిత్స.. మనుషులకు చేసే శస్త్రచికిత్సకు పూర్తి భిన్నంగా ఉంటుంది. సాధారణంగా మానవుల్లో లెన్స్ స్థానంలో వేరేవి అమర్చుతారు. ఏనుగులలో మాత్రం.. అనస్థీషియా ప్రక్రియ ద్వారా శుక్లాన్ని తొలగిస్తారు."
- డాక్టర్ అరవిందన్, పశువైద్యులు.
ఇదీ చూడండి: కొవిడ్ వార్డులో నర్సు స్టెప్పులు.. వీడియో వైరల్
