కేరళలోని కొల్లాం జిల్లాలో ఓ ఇంట జరగాల్సిన పెళ్లి వేడుకలు వాయిదా పడ్డాయి. దీనికి కారణం ఒక్క సెల్ఫీ!
ఏం జరిగిందంటే?
జిల్లాలోని పరవూరుకు చెందిన విను కృష్ణన్కు.. కల్లవుతుక్కల్ గ్రామానికి చెందిన శాండ్రా ఎస్.కుమార్కు ఇటీవలే వివాహం నిశ్చయమైంది. డిసెంబర్ 9న ఘనంగా వివాహాన్ని జరిపించేందుకు ఇరు కుటుంబాలు నిర్ణయించుకున్నాయి. అందుకు సంబంధించిన అన్ని ఏర్పాట్లను పూర్తి చేశాయి. పెళ్లి వేడుకలో భాగంగా వధూవరులు తమ కుటుంబసభ్యులతో గురువారం ఉదయం స్థానికంగా ఉన్న ఓ ఆలయానికి వెళ్లారు. పూజలు చేసి దైవ దర్శనం చేసుకున్నారు.
ఆ తర్వాత అక్కడ దగ్గర్లో ఉన్న క్వారీని చూడడానికి అందరూ వెళ్లారు. అదే సమయంలో విని కృష్ణన్, శాండ్ర క్వారీ అంచుకు వెళ్లి సెల్ఫీ తీసుకుందామనుకున్నారు. ఇద్దరూ సెల్ఫీ స్టిల్ ఇచ్చేందుకు రెడీ అయ్యారు. ఇంతలోనే కాలుజారి ఒక్కసారిగా 120 అడుగుల లోతు ఉన్న ఆ లోయలో పడిపోయింది శాండ్ర. వెంటనే వరుడు కూడా ఆమె కాపాడడానికి దూకేశాడు.
అప్పటికే నీటిలో మునిగిపోతున్న శాండ్రను విని కృష్ణన్ కాపాడి ఒక బండపై కూర్చోబెట్టాడు. ఈ విషయాన్ని గమనించిన ఓ వ్యక్తి.. స్థానికులకు, పోలీసులకు సమాచారం అందించాడు. వెంటనే స్థానికులు అక్కడికి చేరుకుని సహాయక చర్యలు ప్రారంభించారు. క్వారీపై నుంచి తాడు వేసి ఇద్దరినీ గట్టిగా పట్టుకోమన్నారు.
అనంతరం పారిపల్లి పోలీసులు, రెస్క్యూ సిబ్బంది ఒక చిన్న పడవను.. తాడు సహాయంతో లోయలోకి వేశారు. ఆ తర్వాత శాండ్రను విని కృష్ణన్ పడవ మీద కూర్చోబెట్టాడు. విని కృష్ణన్ ఆ పడవను తోసుకుంటూ ఒడ్డుకు చేరుకున్నాడు. స్వల్పంగా గాయపడిన వీరిద్దరినీ కొల్లాంలోని ఓ ప్రైవేట్ ఆస్పత్రికి కుటుంబసభ్యులు తరలించారు. ప్రస్తుతం చికిత్స పొందుతున్నారు. దీంతో శుక్రవారం జరగాల్సిన పెళ్లి వాయిదా పడింది.
