అసోం-నాగాలాండ్లోని శివసాగర్ జిల్లాలో బుధవారం తెల్లవారుజామున ముగ్గురు ఓఎన్జీసీ ఉద్యోగులు అపహరణకు గురయ్యారు. 'ఉల్ఫా' ఉగ్రసంస్థ ఈ కిడ్నాప్ చేసి ఉంటుందని అనుమానాలు వ్యక్తమవుతున్నాయి.
లక్వా ఓన్జీసీ ప్లాంటు వద్ద నుంచి దుండగులు.. సిబ్బందిని కిడ్నాప్ చేసి తీసుకెళ్లారని ఓఎన్జీసీ పేర్కొంది. జూనియర్ టెక్నీషియన్లు ఎమ్ ఎమ్ గొగొయి, రితుల్ సైక్యా, జూనియర్ ఇంజినీరింగ్ అసిస్టెంట్ అలకేశ్ సైక్యా కిడ్నాప్కు గురైనట్లు ఓన్జీసీ ప్రతినిధి స్పష్టం చేశారు.
ఓన్జీసీకి చెందిన వాహనంలోనే అధికారులను కిడ్నాప్ చేసిన దుండగులు.. ఆ వాహనాన్ని అసోం-నాగాలాండ్ సరిహద్దులోని నిమోనగఢ్ అటవీ ప్రాంతంలో వదిలేశారు. అయితే.. కిడ్నాపర్లు నాగాలాండ్ నుంచి తప్పించుకుని ఉంటారని జిల్లా అధికారి అనుమానం వ్యక్తం చేశారు.
ఈ ఘటనపై కేసు నమోదైనట్లు తెలిపిన పోలీసు అధికారులు.. అపహరణకు గురైన వారికోసం గాలిస్తున్నట్లు పేర్కొన్నారు. ప్రస్తుతం దుండగులు ఎలాంటి డిమాండ్లు కోరలేదని స్పష్టం చేశారు.
ఇదీ చదవండి:'ఐఎస్ఐతో సంప్రదింపులు.. ప్రతిపక్షాలకు తిరస్కారాలా?'
