పరిధి దాటి మాట్లాడే ప్రధాన మంత్రిని తాను ఇంతకుముందు ఎన్నడూ చూడలేదని బంగాల్ ముఖ్యమంత్రి, తృణమూల్ కాంగ్రెస్ అధినేత్రి మమతా బెనర్జీ విమర్శించారు. డమ్ డమ్లో ఎన్నికల ప్రచారంలో ఆమె పాల్గొన్నారు. కూచ్బెహార్ తరహాలో మరిన్ని కాల్పులు జరుగుతాయని వ్యాఖ్యానిస్తున్న నేతలను రాజకీయాల నుంచి బహిష్కరించాల్సిన అవసరముందని అభిప్రాయపడ్డారు.
"కూచ్బెహార్ తరహాలో మరింత మందిపై కాల్పులు జరుగుతాయని కొందరు అంటున్నారు. ఇలాంటివి.. రాజకీయాల్లో ఏ మాత్రం మంచిది కాదు. నాలుకను అదుపులో పెట్టుకోవడం నేర్చుకోవాలి. ఇలాంటి నేతలను జైల్లో పెట్టాలి. రాజకీయాల్లో లేకుండా నిషేధించాలి. మాట్లాడేటప్పుడు ఈ విధంగా పరిధులు తప్పి వ్యవహరించే ప్రధాన మంత్రిని నేను ఇదివరకు ఎప్పుడూ చూడలేదు. అందుకు నేను సిగ్గుపడుతున్నాను. బాధపడుతున్నాను. అన్ని మతాల వారికోసం నేను పని చేశాను. ఇప్పుడు భాజపాను తరిమేయటం, దేశాన్ని కాపాడటం ఒక్కటే మిగిలి ఉంది."
- మమతా బెనర్జీ, బంగాల్ మఖ్యమంత్రి
బంగాల్కు ప్రధాన మంత్రి నరేంద్ర మోదీ రావటం వల్ల హింస చెలరేగిందని మమత ఆరోపించారు. దీనిని ఎన్నికల సంఘం సుమోటోగా ఎందుకు పరిగణించి, చర్యలు తీసుకోవటం లేదని ప్రశ్నించారు. ఎన్నికల సంఘం పక్షపాతం లేకుండా వ్యవహరించాలని కోరారు.
వారి కుట్రే!
అంతకుముందు రానాఘాట్లో ఎన్నికల ప్రచారంలో పాల్గొన్నారు మమత. ప్రధాన మంత్రి సూచనలతో కేంద్ర హోం మంత్రి అమిత్ షా.. కూచ్బెహార్లో కాల్పుల ఘటను కుట్ర పన్నారని ఆరోపించారు. తాను మళ్లీ అధికారంలోకి వచ్చాక ఈ ఘటనపై సమగ్ర దర్యాప్తు జరిపిస్తానని చెప్పారు. తాము భాజపాలాగా ప్రజలను కుల, మతాల పేరుతో విభజించేవారం కాదని అన్నారు. అందరినీ మనుషుల్లానే చూస్తామని పేర్కొన్నారు.
అంతకుముందు.. బంగాల్లో హింసకు మమతా బెనర్జీనే బాధ్యురాలని బరాసత్లో ఏర్పాటు చేసిన భాజపా బహిరంగ సభలో పాల్గొన్న ప్రధాని మోదీ ఆరోపించారు. 'హింసకు కారణం తన గూండాలేనని దీదీకి తెలుసు. కాబట్టి వాటి గురించి ఆమె మాట్లాడరు. ప్రతిదీ ఆమె కనుసన్నల్లోనే జరుగుతోంది' అని చెప్పారు.
ఇదీ చూడండి:'గూర్ఖాలపై ఎన్ఆర్సీ ప్రభావం ఉండదు'
