పోలీసుల పేర్లతో మాయమాటలు చెప్పి ఓ వ్యక్తిని ముగ్గులోకి దించారు కొందరు దుండగులు. అతడిని భయపెట్టి రూ.16.50 లక్షలు కాజేశారు. గుజరాత్లోని సూరత్ నగరంలో జరిగిందీ ఘటన. ఈ కేసులో నలుగురు మహిళలు సహా ఆరుగురు నిందితులను పోలీసులు అరెస్టు చేశారు.
మధ్యవయసులో ఉన్న బాధితుడికి డిసెంబర్ 7న సోషల్ మీడియాలో ఓ మహిళ నుంచి మెసేజ్ వచ్చింది. క్రమంగా వీరిద్దరూ స్నేహితులుగా మారారు. ఒకరితో ఒకరు మాట్లాడుకోవడం ప్రారంభించారు. ఆ మహిళ తాను సూరత్లోనే ఉంటున్నానని బాధితుడికి చెప్పింది. వీడియో కాల్స్ చేసి తనను కలవాలని సూచించింది. వరాఛా ప్రాంతంలోని సీతానగర్ అవుట్పోస్ట్ వద్ద కలవాలని చెప్పింది. బాధితుడు ఆమెను కలిసేందుకు వెళ్లాడు. ఆ మహిళ అతడిని హరిధామ్ సొసైటీ సమీపంలోని ఓ ఇంటికి తీసుకెళ్లింది. గదిలోకి తీసుకెళ్లి అతడితో అనుచితంగా వ్యవహరించింది.
ఈ సమయంలోనే ఇద్దరు వ్యక్తులు ఇంట్లోకి దూసుకొచ్చారు. తాను ఆ మహిళ భర్తనని పేర్కొంటూ బాధితుడిపై దాడి చేశాడు. మరో వ్యక్తి తాను మహిళ సోదరుడిని అని చెబుతూ బాధితుడిని కొట్టాడు. బాధితుడి ఫోన్ లాక్కొని పోలీసులకు ఫిర్యాదు చేస్తామని బెదిరించారు. రేప్ కేసు పెడతామని హెచ్చరించారు. అప్పుడే మరో వ్యక్తి వచ్చి మధ్యవర్తిలా నటించాడు. రూ.8.50 లక్షలు ఇస్తే సమస్య పరిష్కారమయ్యేలా చేస్తానని చెప్పాడు. దీంతో బాధితుడు ఈ విషయాన్ని బయటకు రాకుండా చేసుకోవాలని భావించాడు.
ఇంటి పత్రాలు, భార్య నగలు తాకట్టు పెట్టి రూ.4.98లక్షలు సేకరించాడు. కుటుంబ సభ్యుల నుంచి మరో రెండున్నర లక్షలు అప్పు చేసి నిందితులకు ఇచ్చాడు. డిసెంబర్ 19న మరో ఇద్దరు వ్యక్తులు తాము పోలీసులమని పరిచయం చేసుకొని బాధితుడిని బెదిరించారు. అతడిపై కేసు నమోదైందని.. దీనిపై విచారణ జరగకుండా ఉండాలంటే రూ.10 లక్షలు ఇవ్వాలని డిమాండ్ చేశారు. ఎలాగోలా రూ.9లక్షలు సేకరించి వారికి ఇచ్చాడు బాధితుడు.
భవిష్యత్లోనూ ఈ సమస్య తనను వెంటాడుతుందేమోనన్న భయంతో బాధితుడు ఈ విషయాన్ని తన కుటుంబ సభ్యులకు చెప్పాడు. అనంతరం పోలీసులను ఆశ్రయించాడు. కేసు నమోదు చేసుకున్న వరాఛ పోలీసులు.. నలుగురు మహిళలు, ఇద్దరు పురుషులను అరెస్ట్ చేశారు. వీరిలో భార్యాభర్తల జంట కూడా ఉందని చెప్పారు. రూ.5.74 లక్షలను వారి వద్ద నుంచి సీజ్ చేశారు. మరో నిందితుడి కోసం గాలిస్తున్నారు.
మరో ఘటన..
ఉత్తరాఖండ్ దెహ్రాదూన్లో మరో వ్యక్తి సైబర్ నేరస్థుల వలలో చిక్కాడు. బాధితుడికి తొలుత వీడియో కాల్ చేసిన దుండగులు.. అశ్లీల వీడియోలు ఉన్నాయని బెదిరించారు. డబ్బులు ఇవ్వకపోతే ఆ వీడియోలను యూట్యూబ్లో పెడతామని హెచ్చరించారు. దీంతో నెహ్రూ కాలనీకి చెందిన బాధితుడు విడతలవారీగా మొత్తం రూ.4.53లక్షలు వారికి బదిలీ చేశాడు. దీనిపై బాధితుడు పోలీసులను ఆశ్రయించాడు. గుర్తు తెలియని గ్యాంగ్పై కేసు నమోదు చేసుకున్న పోలీసులు.. దర్యాప్తు చేపట్టారు.
