కోర్టు వ్యవహారాలకు సంబంధించి వీడియో కాన్ఫరెన్సుల లింకులను ఇక నుంచి వాట్సాప్ గ్రూప్‌లలో పంపించకూడదని సుప్రీంకోర్టు నిర్ణయించింది. ఈ విషయానికి సంబంధించిన సర్క్యూలర్‌ను సుప్రీంకోర్టు రిజిస్ట్రీ వెల్లడించింది. కొవిడ్‌ కారణంగా దేశంలో వర్చువల్‌ కోర్టుల సంఖ్య పెరిగింది. సుప్రీంకోర్టు కేసుల సమాచారం కూడా వాట్సాప్‌లోనే పంచుకునేవారు. అయితే, ఇప్పటి నుంచి వాటిని రిజిస్టర్డ్‌ ఈ-మెయిల్‌, ధృవీకరించిన మొబైల్‌ నెంబర్‌ ద్వారానే పంపించాలని నిర్ణయించింది. తాజాగా వచ్చిన ఐటీ నిబంధనలు 2021 ప్రకారం ఈ చర్యలు తీసుకున్నట్లు రిజిస్ట్రీ పేర్కొంది.
కోర్టు విచారణలకు సంబంధించిన విషయాలను పంచుకునేందుకు, వాటి వీడియో కాన్ఫరెన్సుల సమాచారాన్ని పంపించేందుకు వాట్సాప్ గ్రూపు క్రియేట్‌ చేయడాన్ని నిలిపివేస్తున్నట్టు సుప్రీం తెలిపింది. సామాజిక మాధ్యమాలు, ఓటీటీ ప్లాట్‌ఫాంలపై కేంద్ర ప్రభుత్వం తీసుకొచ్చిన కొత్త నియమావళికి అనుగుణంగా ఈ నిర్ణయం తీసుకున్నామని సుప్రీంకోర్టు వెల్లడించింది. మార్చి 1 నుంచి వీడియో కాన్ఫరెన్సుల సమాచారాన్ని రిజిస్ట్రీ సూచించిన మాధ్యమాల ద్వారానే పంపించాలని స్పష్టంచేసింది.
ఇదీ చదవండి:నేటి నుంచి వృద్ధులకు కరోనా టీకా
