కరోనా ఉద్ధృతి రోజురోజుకు పెరుగుతున్న నేపథ్యంలో రాష్ట్రాలు ఆంక్షలను కట్టుదిట్టం చేశాయి, పలు చోట్ల లాక్డౌన్ కూడా అమలు కానుంది.
ఛత్తీస్గఢ్లోని రాయ్పుర్ జిల్లాలో 10 రోజుల పాటు లాక్డౌన్ విధిస్తున్నట్లు ఆ రాష్ట్ర ప్రభుత్వం బుధవారం ప్రకటించింది. ఈనెల 9న సాయంత్రం 6 గంటలకు ప్రారంభమై 19వ తేదీ ఉదయం 6 వరకు లాక్డౌన్ ఉంటుందని ప్రకటనలో పేర్కొంది. వైరస్ విజృంభిస్తుండటం వల్ల ప్రజలను కట్టడి చేయడానికే ఈ నిర్ణయం తీసుకున్నట్లు స్పష్టం చేసింది.
లాక్డౌన్ సమయంలో మందుల దుకాణాలు మినహా మిగతా అన్ని షాపులు, వాణిజ్య కేంద్రాలు మూసివేయలని ఆదేశించింది. కేంద్ర ప్రభుత్వ, ప్రైవేటు కార్యాలయాలు, బ్యాంకులు కూడా మూతపడతాయని వెల్లడించింది. టెలికాం, రైల్వే, విమానాశ్రయాలకు మాత్రమే మినహాయింపు ఇస్తున్నామని పేర్కొంది. బహిరంగ సమావేశాలు, మత, సాంస్కృతిక కార్యక్రమాలను నిషేధించింది.
దిల్లీలో రాత్రి కర్ఫ్యూ
వైరస్ వ్యాప్తి దృష్ట్యా దిల్లీలో రాత్రి కర్ఫ్యూను అమలు చేసింది కేజ్రీవాల్ సర్కార్. మంగళవారం నుంచి అమలులోకి వచ్చిన ఈ కర్ఫ్యూ ఈనెల 30 వరకు కొనసాగుతుందని స్పష్టం చేసింది. రాత్రి 10 నుంచి ఉదయం 5 గంటల మధ్య ఈ ఆంక్షలు ఉంటాయని పేర్కొంది.
కర్ఫ్యూ వేళల్లో.. వ్యాక్సిన్ కోసం పంపిణీ కేంద్రాల వద్దే రిజిస్టర్ కావాలనుకునేవారు ముందుగా ఈ-పాస్ తీసుకోవాలని స్పష్టం చేసింది దిల్లీ ప్రభుత్వం. ఈ-పాస్ ఉంటేనే బయటకు వెళ్లేందుకు వారికి అనుమతి లభిస్తుందని తెలిపింది. కొవిన్ యాప్ ద్వారా రిజిస్టర్ అయిన వారు సంబంధిత మెసేజ్ను చూపిస్తే సరిపోతుందని పేర్కొంది.
అక్కడ సెక్షన్ 144..
కరోనా వ్యాప్తి దృష్ట్యా కర్ణాటక ప్రభుత్వం కీలక నిర్ణయం తీసుకుంది. బెంగళూరులో బుధవారం నుంచి 144 సెక్షన్ను అమలులోకి తెచ్చింది. అపార్టుమెంట్లలోని స్విమ్మింగ్‌ పూల్స్‌, జిమ్‌లు, పార్టీ హాల్స్‌పై నిషేధం విధించింది.
పంజాబ్‌లోనూ..
పంజాబ్లో బయటపడుతున్న పాజిటివ్‌ కేసుల్లో 80శాతం బ్రిటన్ రకానివే ఉండడం వల్ల ఆ రాష్ట్ర ప్రభుత్వం అప్రమత్తమైంది. వైరస్ కట్టడి చర్యల్లో భాగంగా రాష్ట్రవ్యాప్తంగా రాత్రి కర్ఫ్యూ అమలు చేయాలని ప్రభుత్వం నిర్ణయించింది. రాత్రి 9 నుంచి ఉదయం 5గంటల వరకు కర్ఫ్యూ ఆంక్షలు అమలులో ఉంటాయని బుధవారం ప్రకటించింది. ఏప్రిల్‌ 30 వరకు కర్ఫ్యూ ఆంక్షలు కొనసాగుతాయని.. ఈ సమయంలో రాజకీయ సభలు, సమావేశాలపై నిషేధం విధించడం సహా మాల్స్‌, మార్కెట్ల వంటి రద్దీ ప్రదేశాల్లో జనసంచారంపై ఆంక్షలు ఉంటాయని పేర్కొంది.
చండీగఢ్లో కూడా బుధవారం నుంచి రాత్రి కర్ఫ్యూ అమలు కానుంది. ఆస్పత్రులు, మెడికల్ షాపులు, ఏటీఎంలకు మినహాయింపు ఇవ్వనున్నారు. రాత్రి 10.30 నుంచి ఉదయం 5 వరకు కర్ఫ్యూ అమలు ఉంటుంది. అయితే ఆంక్షలు ఎన్ని రోజుల వరకు కొనసాగుతాయనే విషయంపై స్పష్టత లేదు.
ఇదీ చదవండి : 'మూడు రోజుల్లో కరోనా టీకాలు ఖాళీ'
