కరోనా రెండో దశ వ్యాప్తిని కట్టడి చేసే చర్యలపై సమీక్షించేందుకు కాంగ్రెస్ పాలిత రాష్ట్రాల ముఖ్యమంత్రులతో కాంగ్రెస్ అధ్యక్షురాలు సోనియా గాంధీ సమావేశమయ్యారు. కొవిడ్ కట్టడికి చేస్తున్న ప్రయత్నాలు, ఆయా రాష్ట్రాల్లో వ్యాక్సిన్ నిల్వలు, ఇతర మందులు, వైద్య పరికరాల గురించి వీడియో కాన్ఫరెన్స్ ద్వారా చర్చించారు.
ఈ సమావేశంలో కాంగ్రెస్ అగ్రనేత రాహుల్ గాంధీ, రాజస్థాన్ సీఎం అశోక్ గహ్లోత్, పంజాబ్ సీఎం అమరిందర్ సింగ్, ఛత్తీస్గఢ్ సీఎం భూపేశ్ బఘేల్ తదితరులు పాల్గొన్నారు.
పంజాబ్లో వ్యాక్సిన్ మరో ఐదు రోజులకు సరిపడ మాత్రమే ఉందని అమరిందర్ సింగ్ తెలిపారు. మరో మూడు రోజులకు సరిపోయే టీకాలు మాత్రమే రాష్ట్రంలో ఉన్నాయని భఘేల్ వెల్లడించారు.
వైరస్ వ్యాప్తిని అడ్డుకునేందుకు టెస్టింగ్-ట్రాకింగ్-వ్యాక్సినేషన్ ప్రక్రియకు ప్రాధాన్యమివ్వాలని సోనియా గాంధీ కోరారు.
కేంద్రం పారదర్శకంగా వ్యవహరించాలి. కరోనా కేసులు, మరణాల సంఖ్యను రాష్ట్రాలు తప్పుగా చూపించొద్దు. భారత్లో వ్యాక్సినేషన్ ప్రక్రియను వేగంగా చేపట్టాలి. మన అవసరాల తర్వాతే.. ఇతర దేశాలకు ఎగుమతి చెయ్యాలి. కొవిడ్ నియమాలు ఆచరిస్తూ అందరూ బాధ్యతాయుతంగా వ్యవహరించాలి. రాష్ట్రాలకు కేంద్రం సహకరించటం సమాఖ్య స్ఫూర్తికి ఇచ్చే గౌరవం. అన్ని రాష్ట్రాలకు సమాన ప్రాతినిధ్యం ఇస్తూ కొవిడ్ను జయించాలి."
-సోనియా గాంధీ, కాంగ్రెస్ అధ్యక్షురాలు
'వ్యాక్సిన్ ఎగుమతితో కొరత..'
కరోనా పరిస్థితులను ఎదుర్కోవటంలో ప్రధాని నరేంద్ర మోదీ విఫలమయ్యారని కేంద్రంపై సోనియా గాంధీ ధ్వజమెత్తారు. వ్యాక్సిన్ను ఇతర దేశాలకు ఎగుమతి చేసి దేశంలో టీకా కొరతను సృష్టిస్తున్నారని ఆరోపించారు. వైరస్ వ్యాప్తి చెందుతున్న నేపథ్యంలో ఎన్నికల ప్రచారాలను రద్దు చేయాలని డిమాండ్ చేశారు. ప్రజల క్షేమం కోసం పాటుపడేలా కేంద్రంపై ఒత్తిడి తెస్తామని పేర్కొన్నారు. మరోసారి లాక్డౌన్ పరిస్థితులు ఎదురైతే రాష్ట్రాల ఆర్థిక స్థితిగతులు ఎలా ఉంటాయనే విషయాన్ని అడిగి తెలుసుకున్నారు.
ఇదీ చదవండి: బంగాల్ ఎన్నికలు: జోరుగా పోలింగ్- ఓటర్ల బారులు
