యుక్తవయసులో సహజీవనం చేస్తూ శృంగారంలో పాల్గొనే వారిపై పోక్సో చట్టం కింద శిక్ష విధించాలా? వద్దా? అనే అంశంపై తమిళనాడు ప్రభుత్వానికి నోటీసులు జారీ చేసింది సుప్రీంకోర్టు. ఈ విషయంపై అభిప్రాయం చెప్పాలని ఆదేశించింది.
ఓ యువకుడితో ఏకాభిప్రాయంతోనే సహజీవనం చేసినట్టు స్పష్టం చేసినప్పటికీ.. యువతి వాదనలను మద్రాసు హైకోర్టు తిరస్కరించడాన్ని సవాలు చేస్తూ దాఖలైన పిటిషన్పై విచారణ చేపట్టింది సుప్రీంకోర్టు.
ఇదీ జరిగింది..
తమిళనాడుకు చెందిన ఓ యువతిని పెళ్లి చేసుకుంటానని నమ్మించిన యువకుడు ఆమెతో సహజీవనం చేశాడు. కానీ వివాహానికి నిరాకరించడం వల్ల ఆమె పోలీసులకు ఫిర్యాదు చేసింది. దీంతో యువకునిపై అత్యాచారం కేసు నమోదైంది.
అయితే విచారణ సందర్భంగా.. తనపై అత్యాచారం జరగలేదని, ఇష్టపూర్వకంగానే శృంగారంలో పాల్గొన్నట్లు యువతి వెల్లడించింది. తిరిగి ఆ యువకునితో సహజీవనం కొనసాగించేందుకు సుముఖంగా ఉన్నట్లు తెలిపింది.
యువతి వాదనలను తిరస్కరించిన కింది కోర్టు.. యువకుడిపై పోక్సో చట్టం కింద కేసు నమోదు చేసి.. 10 సంవత్సరాల జైలు శిక్షతో పాటు, రూ.5 వేల జరిమానా విధించింది. యవతికి లక్ష రూపాయల పరిహారం చెల్లించాలని తీర్పునిచ్చింది.
భిన్న పరిణామాల అనంతరం మద్రాసు హైకోర్టుకు చేరిన ఈ అంశంపై యువతీయువకులిద్దరూ ఒకే వాదనలు వినిపించారు. తమ సంబంధం పరస్పర అంగీకారంతో కూడినదని మద్రాసు హైకోర్టు ఎదుట యువతి సాక్ష్యమిచ్చింది. ఆ వాదనను తోసిపుచ్చిన న్యాయస్థానం ఆమె పిటిషన్ను కొట్టివేసింది.
దీంతో యువతి సుప్రీంకోర్టును ఆశ్రయించింది. మద్రాస్ హైకోర్టు తీర్పుపై వాదనలు విన్న సుప్రీంకోర్టు ధర్మాసనం తమిళనాడు ప్రభుత్వానికి నోటీసులు జారీ చేసింది. యువకుడిపై ఎలాంటి చర్యలు తీసుకోవద్దని ఆదేశించింది.
ఇదీ చదవండి: భార్యలను తీసుకెళ్లని ఎన్ఆర్ఐ భర్తలపై వ్యాజ్యం
