ఉద్యోగానికి ఎందుకు రాలేదని.. పదవీ విరమణ చేసిన ఓ ప్రభుత్వ ఉపాధ్యాయునికి బంగాల్ రాష్ట్ర ప్రభుత్వం షోకాజ్ నోటీసులు జారీ చేసింది. 2023 మార్చి 10న విధులకు ఎందుకు హాజరు కాలేదో వివరణ ఇవ్వాలని సూచించింది. పాఠశాల విద్యా శాఖ పేరిట ఈ నోటీసు జారీ అయింది. చటోపాధ్యాయ అనే రిటైర్డ్ టీచర్కు.. ప్రభుత్వం పేరిట ఈ నోటీసులు అందాయి. ఈయన ఓ ఫిజికల్ ఎడ్యుకేషన్ టీచర్. 36 సంవత్సరాలు పాటు అదే వృత్తిలో పనిచేశారు. చివరగా హూగ్లీలోని ఆది సాప్త్యాగ్రామ్ హై స్కూల్ పనిచేసి.. పదవీ విరమణ చేశారు. కేవలం చటోపాధ్యాయకు మాత్రమే కాకుండా.. మరికొంత మందికి సైతం ప్రభుత్వం నోటీసులు జారీ చేసింది.
ఈ నోటీసులపై చటోపాధ్యాయ స్పందించారు. సెకండరీ ఎడ్యుకేషన్ బోర్డు తీరుపై ఆయన ఆశ్చర్యం వ్యక్తం చేశారు. డీఏ పెంచాలనే డిమాండ్తో సమ్మె చేసిన ఉద్యోగుల జాబితాలో తన పేరు ఉండొచ్చని చటోపాధ్యాయ అభిప్రాయపడ్డారు. "పదవి విరమణ చేసిన మరికొంత ఉపాధ్యాయులకు, చనిపోయిన వారికి కూడా ఈ తరహా నోటీసులే అందినట్లు తెలిసింది. నేను ఉద్యోగుల సమ్మెకు మద్ధతు ఇస్తాను. కానీ రిటైర్డ్ అయ్యాక నోటీసులు రావడమనదే హాస్యాస్పదంగా ఉంది." అని చటోపాధ్యాయ అన్నారు.
బంగాల్ రాష్ట్ర సెకండరీ ఎడ్యుకేషన్ బోర్డు.. 300 పాఠశాల్లో పనిచేసే టీచర్లకు ఈ నోటీసులు జారీ చేసింది. మార్చి 10న.. డీఏ పెంచాలని కోరుతూ సమ్మె చేసిన వారందిరికీ షోకాజ్ నోటీసులు పంపింది. అంతకుముందు ప్రభుత్వ ఉద్యోగులకు అన్ని రకాల సెలవులను రద్దు చేస్తూ.. ప్రభుత్వం నోటిఫికేషన్ జారీ చేసింది.
కాగా బంగాల్ ప్రభుత్వం ఉద్యోగులకు, పదవీ విరమణ చేసిన వారికి 3 శాతం అదనపు డీఏను చెల్లించేందుకు అంగీకరించింది. అంతకు ముందు మూలవేతనంలో 3 శాతాన్ని డియర్‌నెస్ అలవెన్స్‌గా ఇచ్చేది. దీంతో ప్రభుత్వ ఉద్యోగులకు ఇచ్చే డీఏ ఆరు శాతానికి చేరింది. కాగా ప్రభుత్వ అధికారుల తీరుపై కొందరు ఆగ్రహం వ్యక్తం చేస్తున్నారు. ప్రభుత్వ విధుల్లో అంత అలసత్వం ఏంటని ప్రశ్నిస్తున్నారు.
ఉద్యోగులకు కేంద్ర ప్రభుత్వం వార్నింగ్..
ఇదే తరహాలో కేంద్ర ప్రభుత్వం కూడా ఉద్యోగులకు హెచ్చరికలు జారీ చేసింది. పాత పెన్షన్ విధానాన్ని(ఓపీఎస్) పునరుద్ధరించాలంటూ జరగుతున్న నిరసనల్లో పాల్గొనకూడదని ప్రభుత్వ ఉద్యోగులకు సూచించింది. ఈ సూచనను అతిక్రమిస్తే తీవ్ర పరిణామాలు ఎదుర్కోవాల్సి ఉంటుందని తెలిపింది. దేశవ్యాప్తంగా అన్ని జిల్లా కేంద్రాల్లో ర్యాలీలు చేపట్టాలని జాయింట్ ఫోరమ్ ఫర్ రీస్టోరేషన్ ఆఫ్ ఓల్డ్ పెన్షన్ స్కీమ్ ఆధ్వర్యంలోని నేషనల్ జాయింట్ కౌన్సిల్ పిలుపునిచ్చిన తరుణంలో.. ఆ ర్యాలీల్లో ఎట్టి పరిస్థితుల్లోనూ పాల్గొనకూడదని చెప్పింది. ఈ మేరకు అన్ని ప్రభుత్వ శాఖల కార్యదర్శులకు సిబ్బంది, శిక్షణ వ్యవహారాల శాఖ (డీఓపీటీ) ఉత్తర్వులు జారీ చేసింది. పూర్తి వివరాల కోసం ఇక్కడ క్లిక్ చేయండి
