'దిల్లీ ఘటన' ట్వీట్లపై సుప్రీంకు శశిథరూర్​, రాజ్​దీప్​

రైతుల ర్యాలీలో హింసకు ప్రేరేపించేలా ట్వీట్లు చేశారంటూ అభియోగాలు ఎదుర్కొంటున్న పార్లమెంట్​ సభ్యులు శశిథరూర్​, సీనియర్​ పాత్రికేయులు రాజ్​దీప్​ సర్దేశాయ్​లు సుప్రీం కోర్టు ఆశ్రయించారు. దిల్లీ ఘటన తర్వాత స్థానిక వ్యక్తి ఇచ్చిన ఫిర్యాదు మేరకు ఇరువురితో పాటు మరికొందరిపై ఎఫ్​ఐఆర్​ నమోదు చేశారు మధ్యప్రదేశ్​ పోలీసులు.

గణతంత్ర దినోత్సవం రోజున రైతుల ట్రాక్టర్​ ర్యాలీలో చెలరేగిన హింసపై అభియోగాలు ఎదుర్కొంటున్న కాంగ్రెస్​ ఎంపీ శశిథరూర్​, సీనియర్​ జర్నలిస్ట్​ రాజ్​దీప్​ సర్దేశాయ్​లు సుప్రీం కోర్టును ఆశ్రయించారు. రైతుల ఉద్యమాన్ని తప్పుదోవ పట్టించే విధంగా ట్వీట్లు చేశారంటూ మధ్యప్రదేశ్​ పోలీసులు వీరిపై కేసు నమోదు చేశారు. ఎఫ్​ఐఆర్​కు వ్యతిరేకంగా సర్వోన్నత న్యాయస్థానంలో పిటిషన్​ దాఖలు చేశారు నేతలు.

వీరితో పాటు ఈ కేసులో పేర్లు నమోదైన పాత్రికేయులు.. మృణాల్​ పాండే, జాఫర్​ ఆఘా, పరేశ్​ నాథ్​, అనంత్​ నాథ్​లు కూడా ఈ ఎఫ్​ఐఆర్​లను వ్యతిరేకిస్తూ ఉన్నత న్యాయస్థానాన్ని ఆశ్రయించారు.

డిజిటల్ ప్రసారాలు, సామాజిక మాధ్యామాల పోస్టుల ద్వారా వీరు.. హింసను ప్రేరేపించారని స్థానిక వ్యక్తి ఇచ్చిన ఫిర్యాదు ఆధారంగా జనవరి 30న.. ఈ ఎఫ్ఐఆర్​ దాఖలు చేశారు దిల్లీ పోలీసులు. అంతకుముందు.. రైతుల ర్యాలీలో హింసకు కారణమయ్యారంటూ థరూర్​ సహా.. ఆరుగురు పాత్రికేయులపై నోయిడా పోలీసులు దేశద్రోహం కేసు నమోదు చేశారు. జర్నలిస్టులు రాజ్​దీప్ సర్దేశాయ్, మృణాల్ పాండే తదితర పేర్లను ఎఫ్ఐఆర్​లో చేర్చారు.

ఇదీ చదవండి: దీప్​ సిద్ధూపై సమాచారం ఇస్తే రూ.లక్ష రివార్డు