Rakhi For Soldiers : రక్షాబంధన్ సందర్భంగా ఛత్తీస్గఢ్.. బిలాస్పుర్ జిల్లాలోని సాయిమౌళి ఆలయ కమిటీ.. దేశ సైనికుల కోసం ప్రత్యేకమైన రాఖీని సిద్ధం చేసింది. పంజాబ్‌లోని ఉధంపుర్ సైనికులకు పంపేందుకు.. 27 అడుగుల పొడవు, 6 అడుగుల వెడల్పుతో రాఖీని తయారు చేసింది. ఈ ప్రత్యేకమైన రాఖీలో 21 వీరజవాన్ల ఫొటోలను అమర్చింది. వీరి పేర్లను ఇటీవలే భారత ప్రభుత్వం.. 21 అండమాన్ నికోబర్ దీవులకు పెట్టింది.
మోదీ, ద్రౌపదీ ముర్ము ఫొటోలు కూడా..
Rakhi Making For Soldiers : ఈ ప్రత్యేకమైన రాఖీలో రాష్ట్రపతి ద్రౌపదీ ముర్ము, ప్రధాని నరేంద్ర మోదీ, రక్షణ శాఖ మంత్రి రాజనాథ్ సింగ్ చిత్రాలను కూడా ఉంచారు. వీరితోపాటు పరమవీరచక్ర విజేతల ఫొటోలు కూడా పెట్టారు. మొత్తంగా 27 ఫొటోలు ఉన్నాయి. ఈ రాఖీని సాయిమౌళి ఆలయ కమిటీ.. జిల్లా సైనిక్ సంక్షేమ బోర్డు బిలాస్పుర్ అధికారుల ద్వారా రోడ్డు మార్గంలో ఉధంపుర్కు తరలించింది. ఈ కమిటీ గతేడాది 15 అడుగుల పొడవైన రాఖీని తయారు చేసి లద్దాఖ్ సైనికులకు పంపింది.
'కొన్నినెలల పాటు కష్టపడి..'
Rakhi Message For Soldiers : ఈ ప్రత్యేక రాఖీ గురించి కమిటీ సమన్వయకర్త దిలీప్ దేవర్కర్ పాత్రేకర్.. ఈటీవీ భారత్తో మాట్లాడారు. "దేశంలోని సైనికులకు వారి ఇంటి నుంచి వచ్చిన రాఖీ చేరడం కష్టం. ఒకవేళ చేరిన అది చిన్నగానే ఉంటుంది. అందుకే మేం ఈ ప్రత్యేకమైన రాఖీని తయారు చేశాం. గతేడాది రెండున్నర అడుగుల వెడల్పు, 15 అడుగుల పొడవు ఉన్న రాఖీని తయారు చేసి.. లద్దాఖ్కు పంపాం. ఈ సారి కాస్త భిన్నంగా తయారు చేయాలని నిర్ణయించుకున్నాం. అందుకే కొన్ని నెలలపాటు కష్టపడి 27 అడుగుల పొడవు, 6 అడుగుల వెడల్పుతో రాఖీ తయారు చేశాం" అంటూ చెప్పుకొచ్చారు.
స్పెషల్ రాఖీ తయారీకి కారణమిదే!
Rakshabandhan Special : స్పెషల్ రాఖీ తయారీ వెనుక కారణాన్ని కమిటీ సభ్యుడు రాజన్ పాఠే తెలిపారు. "మనం మన ఇళ్లల్లో హాయిగా జీవిస్తున్నాం. మనల్ని శత్రుదేశాల నుంచి కాపాడేందుకు సైనికులు మాత్రం దేశ సరిహద్దుల్లో గస్తీ కాస్తున్నారు. దేశవ్యాప్తంగా అనేక మంది చిన్న రాఖీలు పంపిస్తారు. కానీ ఈ పెద్ద రాఖీ.. దేశ ప్రజలు తమను ఎప్పుడూ ప్రేమిస్తారని గుర్తుచేస్తూ ఉంటోంది. మనం పండుగ రోజుల్లో ఆనందంగా ఉంటాం. వారు మాత్రం పండుగ రోజుల్లో కూడా విధులు నిర్వర్తిస్తుంటారు. అందుకే ఈ రాఖీని సిద్ధం చేశాం" అని రాజన్ పాఠే చెప్పారు.
