వ్యూహకర్త నుంచి రాజకీయ నాయకుడిగా మారిన ప్రశాంత్ కిశోర్.. రాహుల్ గాంధీ జోడోయాత్రపై వ్యంగ్యాస్త్రాలు సంధించారు. 'వారంతా పెద్ద వాళ్లు అని వాళ్లతో పోల్చవద్దు' అని అన్నారు. బిహార్లో పాదయాత్ర చేస్తున్న ఆయన రాహుల్ గాంధీని ఉద్దేశించి ఈ వ్యాఖ్యలు చేశారు. 'మీ పాదయాత్రతో రాహుల్ గాంధీ జోడో యాత్రను పోల్చవచ్చా' అని విలేకరులు అడిగిన ప్రశ్నకు.. ప్రశాంత్ కిశోర్ ఈ విధంగా బదులిచ్చారు.
ప్రశాంత్ కిశోర్ను అవకాశవాదిగా పలువురు విమర్శిస్తున్న నేపథ్యంలో.. ఆ వ్యాఖ్యలను ఆయన కొట్టి పారేశారు. నిస్వార్థంగా పాదయాత్రను చేస్తున్నట్లు తెలిపారు. "రాహుల్ గాంధీ 3,500 కిలోమీటర్లు పాదయాత్ర చేస్తున్నారు. నాకు దూరంతో పని లేదు. అక్టోబర్ నుంచి ఆగకుండా నడుస్తున్నాను. ఫిజికల్ ఫిట్‌నెస్‌కు సాక్ష్యంగా దీన్ని చూపించడం నాకు ఇష్టం లేదు. ఇది ఛట్ పండుగ తపస్సు లాంటిది. కొందరు ఆ తపస్సులో నీరు తాగవచ్చు. నిజమైన భక్తులు అలా చేయరు. 36 గంటల పాటు కఠినమైన ఉపవాసాన్ని పూర్తి చేయకుండా ఉండరు. మిగతా వారిలా నేను న్యూ ఇయర్కు, చిన్నచిన్న వాటికి సెలవు తీసుకోను. ఇంటికి కూడా వెళ్లను. నా లక్ష్యం చాలా పెద్దది. దాన్ని చేరేందుకే నేను కృషి చేస్తున్నాను" అని ప్రశాంత్ కిశోర్ అన్నారు.
గతంలో కాంగ్రెస్ పార్టీలో చేరాలని భావించిన ప్రశాంత్ కిశోర్.. వివిధ కారణాలతో ఆ ప్రయత్నాన్ని విరమించుకున్నారు. జన్ సురాజ్ పేరిట ఆయన పాదయాత్ర చేస్తున్నారు. గతేడాది అక్టోబర్ 2న పాదయాత్ర పారభించారు. ప్రస్తుతం తూర్పు చంపారన్ జిల్లాలోని మోతీహరిలో ప్రశాంత్ కిశోర్ పాదయాద్ర సాగుతోంది.
