బంగాల్ ఎన్నికల ఫలితాలు వెలువడిన నేపథ్యంలో ఆ రాష్ట్రంలోని పలు ప్రాంతాల్లో హింస చెలరేగింది. వేర్వేరు ఘటనల్లో రెండు పార్టీలకు చెందిన కార్యకర్తలు హత్యకు గురయ్యారు. వీరిలో ఇద్దరు భాజపాకు చెందిన వారు కాగా మరోవ్యక్తి ఐఎస్ఎఫ్ సభ్యుడని పోలీసులు గుర్తించారు.
దక్షిణ 24 పరగణాలు జిల్లా సోనార్పుర్ ప్రాంతంలో హరణ్ అధికారి అనే భాజపా కార్యకర్త హత్యకు గురయ్యాడు. తృణమూల్ కాంగ్రెస్ కార్యకర్తలే ఈ దారుణానికి పాల్పడ్డారని కుటుంబసభ్యులు ఆరోపిస్తున్నారు. కోల్కతాలోని బెలెఘటా ప్రాంతంలో అభిజిత్ సర్కార్ అనే భాజపా కార్యకర్తను దుండగులు ఆదివారం రాత్రి హత్యచేశారు.
ఉత్తర 24 పరగణాలు జిల్లా దత్తపుకుర్లో దుండగులు జరిపిన బాంబు దాడిలో ఐఎస్ఎఫ్ కార్యకర్త హన్సుర్ రెహమాన్ అనే వ్యక్తి ప్రాణాలు కోల్పోయాడు. ఇది తృణమూల్ కాంగ్రెస్ నేతల పనే అని కుటుంబసభ్యులు ఆరోపిస్తున్నారు.
ఇదీ చదవండి : బంగాల్ ఉత్తర 24 పరగణాల్లో పేలుడు పదార్థాలు లభ్యం
