PM Modi Life Stone Painting : స్టోన్ పెయింటింగ్తో సత్తా చాటుతోంది ఉత్తర్ప్రదేశ్లోని కాన్పుర్కు చెందిన యువతి. కేవలం 11 రోజుల్లోనే ప్రధాన మంత్రి నరేంద్ర మోదీ జీవిత చరిత్రను రాళ్లపై ఆవిష్కరించింది. దీంతో ఆమె అద్భుతమైన ప్రతిభ పట్ల సర్వత్రా ప్రశంసలు వెల్లువెత్తుతున్నాయి.
సీఎం యోగి, రాష్ట్రపతి కోవింద్ బొమ్మలు!
జిల్లాలోని పంకి ప్రాంతానికి చెందిన హర్షిత అనే యువతి ప్రధాని మోదీ జీవిత చరిత్రను 11 రోజుల్లోనే రాళ్లపై చిత్రీకరించింది. దేశంలోని పలువురు ప్రముఖులు, రాజకీయ నాయకులు, వ్యాపారవేత్తల బొమ్మలనూ గీసింది. వీటిల్లో యూపీ సీఎం యోగి ఆదిత్యనాథ్, మాజీ రాష్ట్రపతి రామ్నాథ్ కోవింద్తో పాటు ప్రముఖ వ్యాపారవేత్త రతన్ టాటా చిత్రాలు కూడా ఉండటం విశేషం.
ఇటీవలే ఆమె రతన్ టాటా కార్యాలయం నుంచి అభినందనలు కూడా అందుకుంది. అంతేకాకుండా నరేంద్ర మోదీ, అమెరికా మాజీ అధ్యక్షుడు డొనాల్డ్ ట్రంప్ ఆలింగనం చేసుకుంటున్న పెయింటింగ్తో పాటు ఆమో గీసిన మాజీ లోక్సభ స్పీకర్ మీరా కుమార్, గణిత శాస్త్రవేత్త శ్రీనివాస రామానుజన్ చిత్రాలు ప్రత్యేక ఆకర్షణగా నిలుస్తున్నాయి.
ఆన్లైన్లో ఆర్డర్ల మోత..!
హర్షిత నైపుణ్యానికి సోషల్ మీడియాలో పెద్దఎత్తున ప్రశంసలు లభిస్తున్నాయి. అంతేకాకుండా తమకు కూడా అటువంటి పెయింటింగ్లు చేసి పంపాలంటూ విదేశాల నుంచి సైతం ఆన్లైన్లోనే ఆర్డర్ల వస్తున్నాయి. స్టోన్ పెయింటింగ్ పట్ల ఆసక్తిని కనబరుస్తున్న యూపీ యువతి.. దీనినే తన కెరీర్‌గా మలుచుకొని ముందుకు సాగుతానని చెబుతోంది. ప్రస్తుతం ఈమె కాన్పుర్ యూనివర్సిటీలో బ్యాచిలర్ ఆఫ్ ఫైన్ ఆర్ట్స్(బీఎఫ్ఏ) చదువుతోంది.
"ప్రతి ఒక్కరి జీవితంలో సక్సెస్ రావాలంటే అంతకన్నా ముందు వచ్చే ఎన్నో సవాళ్లను ధైర్యంగా ఎదుర్కోవాల్సి ఉంటుంది. నేను అదే చేశాను."
- హర్షిత, స్టోన్ పెయింటర్.
ఇలా వచ్చిందా ఆలోచన!
ఇంజినీరింగ్ చేయాలనుకున్న హర్షిత.. కొన్ని కారణాల వళ్ల దానిని చదవలేకపోయింది. ఈ క్రమంలో ఆమె చిన్న పిల్లలకు ట్యూషన్స్ చెప్పేది. అప్పుడు కొందరు విద్యార్థులు హర్షితకు కొన్ని రాళ్లు తెచ్చిచ్చారు. దీంతో తన దగ్గర ఉన్న రంగులతో రాళ్లపై పెయింట్ వేయడం ప్రారంభించింది. ఇలా స్టోన్స్పై పెయింటింగ్ వేస్తే ఎలా ఉంటుందనే ఆలోచన హర్షితకు వచ్చింది. తద్వారా తన స్టోన్ పెయింటింగ్ కళకు పునాది పడింది. ఇక అప్పట్నుంచి ఏమి ఆలోచించకుండా తన ఆసక్తికి పదును పెట్టింది. కొద్ది కాలంలోనే ఆ నైపుణ్యం పట్ల పట్టు సాధించింది. ప్రస్తుతం దానిని నిర్విరామంగా కొనసాగిస్తోంది.
