తాలిబన్లు అఫ్గానిస్థాన్ను వశం చేసుకున్న నాటి నుంచి ఆరు వేరువేరు విమానాల్లో 550 మందిని భారత్కు తరలించినట్లు విదేశాంగ శాఖ ప్రతినిధి అరిందమ్ బాగ్చి తెలిపారు. వీరిలో సుమారు 260 మంది భారతీయులు ఉన్నట్లు పేర్కొన్నారు. ఇతర సంస్థల ద్వారా కూడా భారత్ పౌరులను తీసుకొచ్చేందుకు ప్రభుత్వం అన్ని చర్యలను చేపడుతోందని చెప్పారు. ఇందుకుగానూ అమెరికా, తజికిస్థాన్ వంటి దేశాలతో ఎప్పటికప్పుడు సంప్రదింపులు జరుపుతున్నట్లు వివరించారు.
' మా అంచనా ప్రకారం ఇప్పటి వరకు చాలా మంది భారతీయులను అఫ్గాన్ నుంచి భారత్కు తీసుకువచ్చాం. మరికొంతమంది అక్కడ ఉండే అవకాశం ఉంది. ఎంత మంది ఉన్నారనేది కచ్చితంగా చెప్పలేము. కాబుల్ నుంచి చివరగా వచ్చిన విమానంలో 40 మంది ఉన్నారు. మన దేశం నుంచి వెళ్లి అఫ్గాన్ పౌరులుగా ఉన్న సిక్కులు, హిందువులు కొంతమంది ఆగస్టు 25న విమానాశ్రయానికి చేరుకోలేకపోయారని మాకు సమాచారం అందింది. ఎందుకంటే అక్కడ అఫ్గాన్ పౌరులు విమానాశ్రయం చేరుకోవడానికి చాలా ఇబ్బందులు పడుతున్నారు. అందుకే ఆ విమానం వాళ్లు ఎవరూ లేకుండానే వచ్చింది.'
-అరిందమ్ బాగ్చి, విదేశాంగ శాఖ ప్రతినిధి
అఫ్గాన్లో పరిస్థితులను నిశితంగా పరిశీలిస్తున్నట్లు బాగ్చి చెప్పారు. శాంతి, సామరస్యం, సంపన్నమైన, ప్రజాస్వామ్య అఫ్గాన్ను కోరుకుంటున్నట్లు తెలిపారు. అయితే ప్రస్తుతం ప్రజల తరలింపుకు సంబంధించి భద్రతాపరమైన అంశాలు ఎలా కొలిక్కి వస్తాయో చూడాలని అన్నారు. ఇతర దేశాలు కూడా ఇలానే వ్యవహరిస్తున్నాయని పేర్కొన్నారు.
తాలిబన్ ప్రభుత్వం గుర్తింపుపై స్పందించిన ఆయన.. ప్రభుత్వ ఏర్పాటు అఫ్గాన్లో పరిస్థితులు అనుకున్న విధంగా లేవని అన్నారు. ప్రజల భద్రత పైనే తాము ప్రధానంగా దృష్టిసారిస్తున్నట్లు చెప్పారు. అంతేగాకుండా అక్కడ నుంచి వచ్చే శరణార్థులపై ఎటువంటి నిర్ణయం తీసుకునే దానిపై కూడా స్పందించారు. భారత్కు వచ్చే అఫ్గాన్ పౌరులకు కేంద్ర హోంశాఖ ఈ-ఎమర్జెన్సీ వీసాను ప్రకటించిందని తెలిపారు. వీటి కాల వ్యవధి ఆరునెలలు ఉంటుందని.. దీంతో వారు ఈ సమయంలో ఇక్కడే ఉంటారని అన్నారు.
ఇదీ చూడండి: kabul airport blast: కాబుల్ ఆత్మాహుతి దాడులను ఖండించిన భారత్
