పోటీకి దూరంగా 20 మంది ఎమ్మెల్యేలు, మంత్రులు - కారణమేంటి?

నాలుగు రాష్ట్రాలు, ఒక కేంద్ర పాలిత ప్రాంతంలో అసెంబ్లీ ఎన్నికలు జరగనున్నప్పటికీ.. యావత్​ దేశం దృష్టి మాత్రం బంగాల్ పైనే. ఎన్నికలను ప్రతిష్ఠాత్మకంగా తీసుకున్న అధికార తృణమూల్​ కాంగ్రెస్​ 294 సీట్లకు గాను 291 స్థానాలకు తమ అభ్యర్థులను ప్రకటించి ఆశ్చర్యపరిచింది. అయితే.. ఆ జాబితా 20 మందికిపైగా సిట్టింగ్​ ఎమ్మెల్యేలు, మంత్రులు లేకపోవడం గమనార్హం. పోటీకి వారంతట వారే దూరంగా ఉన్నారా? లేక పార్టీనే పక్కన పెట్టిందా? లేకుంటే అది టీఎంసీ వ్యూహంలో భాగమేనా? మరేదైనా ఆంతర్యం ఉందా?

బంగాల్​ అసెంబ్లీ ఎన్నికలకు సమయం దగ్గరపడుతున్న క్రమంలో ప్రధాన పార్టీలు పొత్తులు, సీట్ల పంపకాలపై ప్రత్యేక దృష్టి సారించాయి. ఈ క్రమంలో పార్టీలు తమ అభ్యర్థులను విడతల వారీగా ప్రకటించేందుకు సమాయత్తమవుతున్నాయి. అయితే అనూహ్యంగా 294సీట్లకు గానూ.. 291 స్థానాలకు తమ అభ్యర్థులను ప్రకటించింది అధికార తృణమూల్​ కాంగ్రెస్ అశ్చర్యపరిచింది. మరో 3 స్థానాలను తమ కూటమి పార్టీ 'గోర్ఖా జన్ముక్తి మోర్చా'(జీజేఎం)కు వదిలేసింది. అయితే.. తాజాగా విడుదల చేసిన జాబితాలో 20 మంది సిట్టింగ్​ ఎమ్మెల్యేలు, మంత్రులు పేర్లు లేకపోవడం రాజకీయ వర్గాలను ఆశ్చర్యానికి గురి చేసింది. అయితే వేరు వేరు కారణాలతో వారే పోటీ నుంచి తప్పుకున్నట్లు ప్రచారం జరుగుతోంది.

ఎన్నికల బరి నుంచి తప్పుకున్న వారిలో కీలక నేతలు.. రాష్ట్ర ఆర్థిక మంత్రి అమిత్​ మిత్రా, రెవెన్యూ మంత్రి అబ్దుల్​ రజాక్​ మొల్లా, వ్యవసాయ శాఖ మంత్రి పుర్నేందు బసులు ఉండటం గమనార్హం. వయసు పైబడటం, కొవిడ్​-19 మహమ్మారి ముప్పు కొనసాగుతుండటం వల్లే వారు తమ అభ్యర్థిత్వం నుంచి తప్పుకోవడానికి కారణమని పార్టీ వర్గాలు తెలిపాయి. మరోవైపు.. భవిష్యత్తు ఎన్నికల్లో తాను తిరిగి పోటీ చేస్తానని తెలిపారు మిత్రా. ప్రస్తుత మహమ్మారి సమయంలో రిస్క్​ తీసుకోదలుచుకోలేదని, అందుకే ఎన్నికల నుంచి తప్పుకుంటున్నట్లు చెప్పారు.

ఆ మంత్రుల స్థానాల్లో ఎవరు?

• ఉత్తర 24 పరగణాల జిల్లాలోని ఖర్దాహా నియోజకవర్గం నుంచి గెలిచిన మిత్రా స్థానంలో.. కాజల్​ సిన్హాకు టికెట్టు ఇచ్చింది అధికార పార్టీ.
• దక్షిణ 24 పరగణాల జిల్లా భంగర్​ నియోజకవర్గంలో రజాక్​ మొల్లా స్థానాన్ని.. మొహమ్మద్​ రెజౌల్​ కరీమ్​తో​ భర్తీ చేయనున్నారు.
• ఉత్తర 24 పరగణాల జిల్లాలోని రాజాఘాట్​ గోపాల్​పుర్​ నుంచి బసు స్థానంలో అదితి మున్షికి టికెట్టు ఇచ్చారు.

పోటీలో కీలక నేతలు..

291 అభ్యర్థుల్లో టీఎంసీ నేత మదన్​ మిత్రా.. ఉత్తర 24 పరగణాల జిల్లాలోని కమరహట్టి నియోజకవర్గం బరిలో నిలుస్తున్నారు. కోల్​కతా పోర్ట్​ నుంచి రాష్ట్ర పట్టణాభివృద్ధి శాఖ మంత్రి ఫిర్హాద్​ హకిమ్​ పోటీ చేస్తున్నారు. కోల్​కతాలోని భవానిపుర్​ నుంచి ఎమ్మెల్యే సోభన్​దేబ్​ ఛటోపాధ్యాయ్​ నిలబడుతున్నారు. నటి సయాంతికా బెనర్జీ-బంకుర్​, నటుడు చిరంజీత్​ చక్రబర్తి- బరసత్​, క్రికెటర్​ మనోజ్​ తివారి- శిబ్​పుర్​ల నుంచి బరిలో నిలుస్తున్నారు.

ఆసక్తికరంగా ఆ మూడు స్థానాలు..

ఈ ఎన్నికల్లో జీజేఎంతో జత కలిసింది అధికార పార్టీ టీఎంసీ. కలింపోంగ్​, డార్జీలింగ్​, కుర్సేంగ్​ స్థానాలకు మిత్ర పక్షానికి సైతం కేటాయించింది. జీజేఎం నేత బీమల్​ గురుంగ్ ఇప్పటికే అభ్యర్థులను కూడా ప్రకటించారు. మరోవైపు.. జీజేఎం తిరుగుబాటు నేత, బెనోయ్​ తమాంగ్​ కూడా ఈ మూడు స్థానాల్లో తమ అభ్యర్థులను బరిలో దింపుతామని ప్రకటించారు. ఈ క్రమంలోనే ఈ మూడు స్థానాల్లో పోటీకి దూరంగా ఉండాలని నిర్ణయించింది తృణమూల్​ కాంగ్రెస్​. ఈ ప్రాంతంలోని మరో పార్టీ జీఎన్​ఎల్​ఎఫ్​.. భాజపాకు మద్దతు పలుకుతోంది. దానితో ఈ మూడు స్థానాలను జీఎన్​ఎల్​ఎఫ్​కే వదిలేసే అవకాశాలు మెండుగా ఉన్నాయి. మొత్తంగా ఈ స్థానాల్లో జేజీఎమ్​, జీఎన్​ఎల్​ఎఫ్​, కాంగ్రెస్​-లెఫ్ట్​-ఐఎస్​ఎఫ్​ కూటమిల మధ్య ప్రధాన పోటీ ఉండనుంది. తెరాయ్​, దూవార్స్​ ప్రాంతంలోని ఎన్నికల్లో తృణమూల్​కు మద్దతుగా నిలుస్తామని జీజేఎమ్​కు చెందిన గురుంగ్​, తమాంగ్​ వర్గాలు ప్రకటించటం ఆసక్తికరంగా మారింది.

ఇదీ చూడండి: మమత స్థానచలనం వెనక మతలబేంటి?