అసోంలోని మారుతీ క్వాలిటీ ప్రొడక్ట్ ప్రైవేట్ లిమిటెడ్ గోడౌన్లో 50కేజీల లక్ష బియ్యం సంచుల్ని పోలీసులు స్వాధీనం చేసుకున్నారు. ఈ కంపెనీ యజమాని దీపక్ అగర్వాల్ పరారీలో ఉన్నట్లు తెలిపారు. ఈ స్కాంలో ప్రభుత్వ అధికారులతో పాటు చాలా మంది ఉన్నారని పోలీసులు అనుమానం వ్యక్తం చేస్తున్నారు. దీనిపై కేసునమోదు చేసుకుని దర్యాప్తు చేస్తున్నట్లు తెలిపారు.
కామ్రూప్ జిల్లాలో అనుమానంగా వెళుతున్న కంటైనర్ల గురించి నదియార్ పర్ గ్రామస్థులు ఇచ్చిన సమాచారం మేరకు పోలీసులు, జిల్లా అధికారులు తనిఖీలు చెపట్టారు. తనిఖీలలో బియ్యం సంచుల లోడ్తో వెళుతున్న ఓ ట్రక్కును పట్టుకుని డ్రైవర్ను అదుపులోకి తీసుకున్నారు. డ్రైవర్ ద్వారా అక్రమంగా నిల్వ ఉంచిన బియ్యం గురించి తెలుసుకున్న పోలీసులు, జిల్లా అధికారులు.. గోడౌన్కు వెళ్లి లక్ష సంచుల్ని స్వాధీనం చేసుకున్నారు.
భారత ఆహార సంస్థ(ఎఫ్సీఐ)కు చెందిన ఈ బియ్యాన్ని తమ బ్రాండ్ పేరుతో ప్యాక్ చేసి మేఘాలయాలోని అసోం రైఫిల్స్కు ఎగుమతి చేయాలని ఈ కంపెనీ ప్రయత్నించిందని పోలీసులు తెలిపారు. దీనికి సంబంధించి గోడౌన్లో ఉన్న 13 ట్రక్కులను సీజ్ చేశారు. కాగా ఈ కంపెనీకి వివిధ దేశాలోని పెద్ద పెద్ద ఆహార సంస్థలతో సంబంధాలున్నాయని తెలిపారు.
ఇదీ చదవండి: 'మైనారిటీలూ.. కుటుంబ నియంత్రణ పాటించండి'
