ప్రపంచంలో అత్యంత ఎక్కువ దూరం పయనించే నదీ క్రూయిజ్ షిప్ 'ఎంవీ గంగా విలాస్'.. బిహార్ ఛప్రాలోని నది మధ్యలో సోమవారం చిక్కుకుపోయిందని వార్తలు చక్కర్లు కొట్టాయి. అయితే దీనిపై ఐడబ్ల్యూఏఐ ఛైర్మన్ సంజయ్ క్లారిటీ ఇచ్చారు. నదిలో నీటి మట్టం తక్కువగా ఉండడం వల్ల క్రూయిజ్ షిప్ ఒడ్డుకు చేరుకోలేకపోయిందని తెలిపారు. షెడ్యూల్ ప్రకారమే నౌక.. పట్నా చేరుకుందని చెప్పారు.
వారణాసి నుంచి ఛప్రా వెళ్లిన క్రూయిజ్ షిప్.. నదిలో నీటిమట్టం తక్కువగా ఉండడం వల్ల ఆగింది. అనంతరం అందులో ఉన్న 32 మంది పర్యటకులను చిన్న మోటర్ బోట్ల ద్వారా.. ఒడ్డుకు చేర్చారు ఎస్డీఆర్ఎఫ్ సిబ్బంది. అనంతరం ఛప్రాలో చిరాండ్ పురావస్తు ప్రదేశాలను పర్యటకులు తిలకించారు. మళ్లీ ఆ చిన్న బోట్లలోనే క్రూయిజ్ షిప్కు టూరిస్ట్లు చేరుకున్నారు. అంతకుముందుకు ఒడ్డుకు చేరుకున్న పర్యటకులకు స్థానిక ప్రజలు ఘనస్వాగతం పలికారు. డప్పులు వాయిస్తూ.. పూలమాలు వేసి వెల్కమ్ చెప్పారు. ఎంవీ గంగా విలాస్ మొదటి ట్రిప్‌లో స్విట్జర్లాండ్కు చెందిన 32 మంది నౌకా ప్రయాణాన్ని ఆస్వాదిస్తున్నారు.
గంగా విలాస్ గురించి..
ఎంవీ గంగా విలాస్ నౌకను వారణాసిలోని రవిదాస్ ఘాట్లో వర్చువల్ ద్వారా మోదీ జనవరి 13న ప్రారంభించారు. ఈ గంగా విలాస్ నౌక.. భారత్, బంగ్లాదేశ్‌లో 27నదుల గుండా 51 రోజుల్లో 3,200 కిలోమీటర్ల దూరం పయనించనుంది. భారతీయ సంప్రదాయం ఉట్టిపడేలా రూపొందించిన ఈ నౌకలో ప్రయాణికుల కోసం అత్యాధునిక సౌకర్యాలను ఏర్పాటు చేశారు. సూట్‌ గదులు, స్పా, జిమ్‌ సెంటర్ల వంటివి ఇందులో ఉన్నాయి. ఎన్నో ప్రత్యేకతలున్న ఈ నౌక ప్రయాణ ధరను రూ. 12.59 లక్షలుగా నిర్ధరించారు.
51 రోజుల్లో 50 పర్యటక స్థలాలు..
భారత్‌లోని ఉత్తర్‌ప్రదేశ్‌, బిహార్, బంగాల్‌, అసోంతో పాటు బంగ్లాదేశ్‌లోని నదుల్లో ఈ నౌక పయనించనుంది. ప్రధాన నదులైన గంగా, బ్రహ్మపుత్రతో పాటు భాగీరథి, హుగ్లీ, బిద్యావతి, మాట్లా, బంగ్లాదేశ్‌లో మేఘన, పద్మ, జమున నదుల్లో విహరిస్తుంది. గంగా విలాస్ యాత్ర ఉత్తర్‌ప్రదేశ్‌లోని వారణాసిలో మొదలై అసోంలోని దిబ్రుగఢ్‌లో ముగుస్తుంది. మొత్తం 51 రోజుల ఈ సుదీర్ఘ ప్రయాణంలో 50 ప్రసిద్ధ పర్యటక ప్రాంతాల్లో ఆగుతుంది.
ప్రపంచ వారసత్వ ప్రాంతాలనూ..
ఉత్తర్‌ప్రదేశ్‌లో వారణాసి, బిహార్లోని పట్నా, ఝార్ఖండ్‌లోని సాహిబ్‌గంజ్‌, బంగాల్‌లోని కోల్‌కతా, బంగ్లాదేశ్‌లో ఢాకా, అసోంలోని గువహటిలో ఉన్న ప్రపంచ వారసత్వ ప్రదేశాలు, జాతీయ పార్కులు, నదీ ఘాట్‌ల గుండా ఈ నౌక పయనించనుంది. వారణాసిలో గంగా హారతి, బౌద్ధమతానికి కీలకమైన సారనాథ్‌, తాంత్రిక్‌ క్రాఫ్ట్‌కు ప్రసిద్ధిగాంచిన మయోంగ్‌, ప్రపంచంలోనే అతిపెద్ద నదీ ద్వీపం మజులి, బిహార్లోని విక్రమశిల యూనివర్శిటీ, రాయల్‌ బంగాల్‌ పులులకు ప్రఖ్యాతిగాంచిన సుందర్బన్‌ డెల్టా, ఖడ్గమృగాలు ఉండే కజీరంగా నేషనల్‌ పార్కు లాంటి ప్రపంచ వారసత్వ ప్రాంతాలను ఈ యాత్రలో చూడొచ్చు.
లగ్జరీ సదుపాయాలు..
62 మీటర్ల పొడవు, 12 మీటర్ల వెడల్పు ఉండే ఈ భారీ క్రూజ్‌లో 18 సూట్లు ఉన్నాయి. 36 మంది ప్రయాణికులు ఇందులో ప్రయాణించొచ్చు. మూడు సన్‌ డెక్‌లు, జిమ్‌ సెంటరు, స్పా సదుపాయం ఉంది. నదీ వ్యూ కన్పించేలా ఉండే పారదర్శక లాంజ్‌లో ప్రకృతి అందాలను ఆస్వాదించొచ్చు. ప్రయాణికులను ఆహ్లాదపర్చేలా నౌకలో కళా సాంస్కృతిక ప్రదర్శనలూ ఏర్పాటు చేయనున్నారు.
