యూపీలో గతవారం జరిగిన అత్యాచార ఘటన ఆలస్యంగా వెలుగులోకి వచ్చింది. 17 ఏళ్ల బాలికపై ఓ యువకుడు అఘాయిత్యానికి పాల్పడినట్టు పోలీసులు వెల్లడించారు. అత్యాచారం అనంతరం.. మతం మార్చుకోవాలంటూ సదరు బాలికపై అతడు ఒత్తిడి తెచ్చినట్టు సమాచారం. ఈ ఘటనకు కారకుడైన నిందితుణ్ని అరెస్ట్ చేసినట్టు పోలీసులు తెలిపారు.
ఇదీ జరిగింది..
ఫతేపుర్లోని లాలౌలీ పోలీస్ స్టేషన్ పరిధిలో శుక్రవారం(ఈ నెల 12న) రాత్రి.. రాజు అన్సారీ(23) ఓ బాలికను తన ఇంట్లోకి తీసుకెళ్లి అత్యాచారం చేశాడు. బాలిక కనిపించడం లేదని కుటుంబ సభ్యులు పోలీసులను ఆశ్రయించారు. దర్యాప్తు చేపట్టిన పోలీసులు.. శనివారం ఉదయం ఆమెను రాజు ఇంట్లో గుర్తించారు. ఈ ఘటనలో బాధితురాలిని మతం మార్చుకోవాలని నిందితుడు బలవంతం చేశాడని పోలీసులు వెల్లడించారు.
కుటుంబ సభ్యుల ఫిర్యాదు మేరకు అన్సారీని సోమవారం సాయంత్రం అరెస్ట్ చేశారు పోలీసులు. అతడిపై భారతీయ శిక్షాస్మృతి, యూపీలోని బలవంతపు మత మార్పిడి నిషేధ చట్టం కింద కేసు నమోదు చేశారు.
ఇదీ చదవండి: కొండచిలువను వేటాడిన పులి
